Redaktor seçimi

Video

  • Davamı

  • Vəkillərin vəsatətləri təmin olunmayıb

    Üç ilə yaxın Almaniyada mühacir kimi yaşamış, 2021-ci ilin noyabrında Azərbaycana deportasiya olunduqdan sonra həbs edilən Azərbaycan Xalq Cəbhəsi Partiyasının (AXCP) üzvü Pünhan Kərimlinin məhkəməsi başlayıb. Mayın 25-də Bakı Ağır Cinayətlər Məhkəməsində onun işi üzrə keçirilən məhkəmə iclasına gələnlərdən yalnız atasına prosesi izləməyə icazə verilib. Jurnalistlər, hüquq müdafiəçiləri, Pünhan Kərimlinin digər qohumları heç bir əsas göstərilmədən məhkəmə prosesinə buraxılmayıb.

    Hakim Samir Əliyevin sədrliyilə keçirilən məhkəmə iclasında Pünhan Kərimlinin vəkili onun barəsində cinayət işinə xitam verilməsi barədə vəsatət qaldırıb. Vəkil deyib ki, ittiham tam əsassızdır.

    Pünhan Kərimli özü də təqsirsiz olduğunu, narkotikin onun cibinə polislərin özləri tərəfindən atıldığını bildirib. O vurğulayıb ki, şərlənməsinin səbəbi AXCP üzvü olması, hökuməti tənqid edən fikirlər səsləndirməsi, Almaniyada etiraz aksiyalarında iştirak etməsidir.

    Cinayət işinə xitam verilməsi haqda vəsatət təmin edilməyib. Vəkil daha bir vəsatət qaldırıb ki, heç olmasa, məhkəmə yekun hökm çıxarana qədər ev dustaqlığına buraxılsın. Bu vəsatət də təmin edilməyib.

    Müdafiəçi həmçinin Pünhan Kərimlinin atasının əlavə şahid qismində dindirilməsi, kamera görüntülərinin alınıb baxış keçirilməsi haqda vəsatətlər qaldırıb. Hakimlər deyib ki, prosesin gedişində bu məsələlərə baxılıb qərar veriləcək.

    Məhkəmə baxışı iyunun 1-nə təyin edilib.

    1989-cu il təvəllüdlü Pünhan Kərimli CM-in 234.4.3 (satış məqsədilə külli miqdarda narkotik əldə etmə, daşıma, saxlama) maddəsilə ittiham olunur.

    Məhkəmədən sonra jurnalistlərə açıqlama verən atası Vahid Kərimov bildirib ki, oğluna qarşı ittiham saxtadır:

    “Yasamalda polislərin başına zibil atdığına görə vətəndaşların evlərindən zorakılıqla, alt paltarında aparılmasına etiraz edənlər arasında oğlum da olub. Etiraz aksiyası keçirilib, orada iştirak edib. Həbsinin əsas səbəblərindən biri budur. Qanun deyir ki, adam saxlanılanda ailəsinə məlumat verilməlidir. Biz oğlumun yerini 36 saat sonra öyrəndik. Saxlayanda deyiblər ki, üstündə silah var, amma idarəyə aparıb narkotik çıxarıblar. Necə oldu silah narkotikə çevrildi?”

    Ata hesab edir ki, oğlunun məhkəməsinə adamları məqsədli şəkildə buraxmırlar:

    “Bu biabırçılıqların üstü açılacaq…”

    Almaniyadan deportasiya edilənlərdən 6 nəfər həbs olunub. Onlardan 5-i haqqında cinayət işi başlanıb, 1 nəfərə isə inzibati həbs qərarı kəsilib.

    Onların hamısı şərləndiklərini deyirlər. Daxili İşlər Nazirliyi isə bu barədə səslənən fikirlərin əsassız olduğunu bəyan edib.

  • Ölənlərin 19 nəfərinin şagird olduğu deyilir

    ABŞ-ın Texas ştatında ibtidai məktəbə silahlı hücum olub, nəticədə 21 nəfər ölüb.

    Həlak olanlardan 19 nəfərin şagird, 2 nəfərin yaşlı şəxs olduğu bildirilir.

    Texas qubernatoru Qreq Abbott bildirib ki, hücum edən 18 yaşlı Salvador Ramos adlı yerli şəxs olub.

    O, polis tərəfindən güllələnib.

    Hücum edən şəxsin tapança və AR-15 tüfəngindən istifadə etdiyi bildirilir.

    Hücumdan sonra açıqlama verən ABŞ Prezidenti Co Bayden: “Allah xatirinə, silah lobbisinin qarşısına nə vaxt çıxacağıq?” – deyib.

    18 yaşlı bir oğlanın mağazadan silah ala bilməsi fikrinin yanlış olduğunu bildirən Bayden əlavə edib ki, bu cür kütləvi atışma dünyanın başqa bir yerində nadir hallarda olur.

    “Bu ağrını hərəkətə çevirməyin vaxtı gəldi”, – deyə Bayden söyləyib və silah alışı qanunlarında islahatlara çağırış edib.

    Bayden Ağ Evdə və Birləşmiş Ştatlardakı federal binalarda bayraqların yarıya qədər endirilməsini tapşırıb.

    Qarşıdurma zamanı 2 polisin də yaralandığı bildirilir.

    Onların vəziyyətinin yaxşı olduğu qeyd edilir.

    Təhlükəsizlik qüvvələrinin “CBS News”a verdiyi məlumata görə, hücumçu məktəbə gəlmədən öncə nənəsini də öldürüb.

    “EdWeek“ təhsil sənayesi jurnalının məlumatına görə, keçən il ABŞ-da məktəblərdə 26 atışma olub.

    Mayın 24-də Senatda çıxış edən Demokratik Konnektikut senatoru Chris Murphy həmkarlarını silaha nəzarət qanununu qəbul etməyə çağırıb.

    “Bu uşaqların bəxti gətirmədi. Belə hücumlar yalnız bu ölkədə baş verir”, – deyə o bildirib.

    Apreldə aparılan bir araşdırmada 2020-ci ildə Amerika uşaqları və gənclərinin ölümünün əsas səbəbi kimi güllələnmə olduğu göstərilib.

    Başqa bir statistikada bildirilir ki, ABŞ-da mülki vətəndaşların 390 milyondan çox silahı var.

Siyasət

Bölgə

Sosial

Fikrimcə

Araşdırma

Sağlıq

Mədəniyyət