Onlar məhkəmə zalında həbs olunublar
Metronun “İçərişəhər” stansiyasının qarşısında yerləşən, Hacı Zeynalabdin Tağıyevin heykəlinin təsbeh hissəsini sındırmaqda ittiham olunan iki nəfərin məhkəməsi yekunlaşıb. Mayın 26-da Səbail Rayon Məhkəməsində onlara hökm oxunub.
Hakim Azər Tağıyevin çıxardığı hökmə əsasən, təqsirləndirilən şəxslərdən 31 yaşlı Vüqar Tağızadə 1 il 6 ay, 26 yaşlı Allahverdi Məmmədli isə 1 il azadlıqdan məhrum edilib.
Onlar Cinayət Məcəlləsinin 221-ci (Xuliqanlıq) və 246-cı (Tarix və mədəniyyət abidələrini qəsdən məhv etmə və ya korlama) maddələri ilə təqsirli bilinib.
Təqsirləndirilən şəxslər istintaq və məhkəmə dövründə azadlıqda idi. Onlar hökm elan ediləndən dərhal sonra məhkəmə zalında həbs olunublar.
Bu ilin yanvar ayında sosial mediada Hacı Zeynalabdin Tağıyevin yeni ucaldılan heykəlinin sındırılması haqda görüntülər yayılmışdı. Bundan dərhal sonra adları çəkilən şəxslər məsuliyyətə cəlb edildi.
Hadisədən az sonra heykəlin sındırılan hissəsi bərpa edilib.
