İordanski məmurun dul arvadına dəyən mənəvi ziyana görə 3 milyon rubl da ödəməlidir
Rusiya energetika nazirinin sabiq müavini Leonid Tropkonu döyməkdə ittiham olunan 33 yaşlı aktyor Qleb Neyjmak-İordanskinin 8 il müddətinə azadlıqdan məhrum edildiyi bildirilir.
Bu haqda məlumat Moskva Prokurorluğunun “Telegram” kanalında yerləşdirilib.
Moskvanın Doroqomilovski Rayon Məhkəməsi Neyjmak-İordanskini Rusiya Cinayət Məcəlləsinin 111-ci maddəsinin 2-ci hissəsinin “d” bəndində nəzərdə tutulmuş cinayəti (qəsdən sağlamlığa ağır zərər vurma, təhlükəli zərər vurma) törətməkdə təqsirli bilib.
Məhkəmə həmçinin məmurun dul arvadına dəyən mənəvi ziyana görə 3 milyon rubl iddiasını da təmin edib.
Hadisənin 2021-ci ildə baş verdiyi bildirilir.
İstintaq müəyyən edib ki, Tropko ilə qonşuluqda yaşayan Qleb Neyjmak-İordanski general Yermolov küçəsindəki evin girişi yaxınlığında onu möhkəm döyüb.
Münaqişə giriş qapısına görə baş verib.
Aktyor qapını açıq saxlamaq məqsədilə giriş qapısına daş qoyub.
69 yaşlı eks-məmur aktyordan bunu etməməsini istəyib.
Neyjmak-İordan bu məsləhətə aqressiv reaksiya verərək təqaüdçüyə hücum edib.
Nəticədə başından xəsarətlə xəstəxanaya yerləşdirilən sabiq nazir müavini hadisədən iki həftə sonra orada vəfat edib.
Qleb Neyjmak-İordanski sosial şəbəkələrdə aktyor Lusifer kimi tanınır.
O, özünü seksoloq, model və ictimai xadim kimi də təqdim edirdi.