Türkiyədə ana müxalifət düşərgəsində siyasi dəyişiklik baş verib. Cümhuriyyət Xalq Partiyasının (CHP) parlament qrupunun sədri Özgür Özəl və onunla birlikdə 91 CHP deputatı partiyadan istefa verərək YENİ Partiyanın yaradıldığını elan ediblər.
Məlumata görə, Özgür Özəl YENİ Partiyanın təsis sənədlərini imzalayıb və partiyanın yaradılması üçün müraciət Daxili İşlər Nazirliyinə təqdim olunacaq. Partiyanın Qurucular Şurasına 91 deputat daxil olub. Bildirilir ki, ehtiyat hüquqi variant kimi “Dəyişim Partiyası” adlı ikinci siyasi təşkilat da yaradılacaq.
Sənədləri imzaladıqdan sonra Özgür Özəl “Vətənimizə, millətimizə, partiyamıza və hamımıza xeyirli olsun” deyib. Partiyanın adı və loqosu da açıqlanıb, Özəl isə sosial media hesablarındakı bioqrafiyasını yeniləyib.
Parlamentdə qüvvələr nisbəti dəyişir
91 deputatın CHP-dən ayrılması ilə partiyanın parlamentdəki təmsilçiliyi 44 deputata enir. Bununla CHP Türkiyə Böyük Millət Məclisində ikinci ən böyük siyasi qüvvə statusunu itirərək beşinci yerə geriləyir.
Məlumata görə, parlamentdə mandat bölgüsü belə formalaşacaq:
- AK Partiya – 277 deputat;
- YENİ Partiya – 91 deputat və ana müxalifət statusu;
- DEM Partiya – 56 deputat;
- Milliyyətçi Hərəkat Partiyası (MHP) – 46 deputat;
- CHP – 44 deputat.
Bunlardan sonra parlamentdə İYİ Partiya, Yeni Yol qrupu və müstəqil deputatlar yer alacaq.
CHP-də rəhbərlik seçkiləri gözlənilir
CHP-də deputat sayının azalması səbəbindən bundan sonra iki deyil, yalnız bir qrup sədr müavini fəaliyyət göstərəcək.
Kemal Kılıçdaroğlunun millət vəkili olmaması səbəbindən partiyanın parlament qrupunda yeni qrup sədri seçiləcək. Bu vəzifə üçün Faik Öztrakın adı ön plana çıxır. Qrup sədr müavini postu uğrunda isə seçki keçiriləcəyi bildirilir.
Məlumatlara görə, CHP-də qalan deputatların hamısı Kılıçdaroğlunun tərəfdarı deyil. Onların arasında həm “üçüncü yol” adlandırılan qrupun nümayəndələri, həm də partiyadan ayrılmadan mübarizəni davam etdirməyi müdafiə edən siyasətçilər var. Bu qrupların da rəhbər vəzifələr üçün öz namizədlərini irəli sürəcəyi gözlənilir.
Parlament komissiyalarında üstünlük dəyişir
Yeni siyasi qüvvənin formalaşması ilə parlament komissiyalarındakı təmsilçilik də dəyişəcək. CHP-nin komissiyalardakı yerlərinin azalacağı, çoxluğun isə YENİ Partiyaya keçəcəyi bildirilir.
Özgür Özəlin gün ərzində YENİ Partiyanın parlament qrupu və qərarverici orqanlarının formalaşdırılması ilə bağlı toplantı keçirəcəyi gözlənilir.
Simvolik mesajlar diqqət çəkib
CNN Türk-ün Ankara təmsilçisi Dicle Canovanın sözlərinə görə, Özgür Özəl təsis sənədlərini imzalayarkən yayımlanan görüntülərdə bir sıra simvolik detallara yer verilib.
Kadrlarda Özgür Özəlin CHP nişanını çıxararaq Türkiyə bayrağı nişanını taxdığı görünür. Arxa planda isə Mustafa Kamal Atatürkün portreti və “Hakimiyyət qeyd-şərtsiz millətindir” ifadəsi yer alır.
Şərhçilərin fikrincə, bu addım Özgür Özəlin yeni siyasi hərəkatını xalqın iradəsi ilə əlaqələndirmək cəhdi kimi qiymətləndirilir.
İstefa prosesi necə davam edəcək?
Məlumata görə, deputatların CHP-dən istefası e-Devlet sistemi vasitəsilə rəsmiləşdirilib. İstefalar Yargıtay tərəfindən təsdiqləndikdən sonra rəsmi qeydiyyata alınacaq və deputatların CHP üzvlüyünə xitam veriləcək.
YENİ Partiyanın təsis ərizəsi təqdim edildikdən sonra istefa verən deputatlar fəaliyyətlərini Türkiyə Böyük Millət Məclisində YENİ Partiyanın millət vəkilləri kimi davam etdirəcəklər.
