Yerevanda məhkəmə Baş nazir Nikol Paşinyanın Rusiya-Ermənistan əsilli iş adamı Samvel Karapetyana qarşı qaldırdığı böhtan iddiasını qəbul edib. Karapetyan “Güclü Ermənistan” Alyansına rəhbərlik edir və qarşıdan gələn parlament seçkilərində Paşinyanın sorğularda ən yüksək göstəriciyə malik rəqibidir. Mayın əvvəlində Karapetyan Paşinyanı ictimai çıxışlarından əvvəl Çindən əldə etdiyi ”halüsinogen göbələk”lərdən istifadə etməkdə ittiham edib və bunu Paşinyanı ciddiyə almamaq üçün səbəb kimi göstərib.
OC Media yazır ki, Paşinyan ittihamları dərhal rədd edib və qısa müddət sonra Karapetyana qarşı məhkəmə iddiası qaldırmağı planlaşdırdığını bildirib.
“Əlbəttə, mən Karapetyanı məhkəməyə verəcəyəm və sözün hüquqi mənasında Karapetyana bir ton halüsinogen göbələyi yedizdirəcəyəm. Sərt ifadəmə görə üzr istəyirəm, amma sonda hər şeyin bir həddi var”, – Paşinyan mayın əvvəlində deyib.
Dövlətə məxsus “Armenpress” media qurumu cümə günü iddianın qəbul edildiyini və Paşinyanın Karapetyandan 6 milyon dram (16 250 dollar) məbləğində təzminat, həmçinin rəsmi təkzib və üzrxahlıq tələb etdiyini bildirib.
Baş nazirliyə namizəd kimi göstərilməsinə baxmayaraq, Karapetyan alyansın seçki siyahısına daxil edilməyib. Onun namizədliyi hüquqi tələblərə görə mübahisələrə səbəb olub: bu tələblərə əsasən, həmin vəzifəyə namizədlər yalnız Ermənistan vətəndaşlığına malik olmalı və son dörd il ərzində ölkədə yaşamalıdırlar – Karapetyan isə bu tələblərə cavab vermir.
Karapetyan aprel ayında seçkilərdən əvvəl Rusiya və Kipr vətəndaşlığından imtina prosesinə başladığını açıqlayıb.
Hazırda o, dövlət çevrilişinə çağırışla bağlı cinayət ittihamları üzrə ev dustaqlığındadır.
Bu yazı ingilis dilindən tərcümə edilmişdir. Yazının əslini OC Media-dan oxuya bilərsiniz.
