Tofiq Həsənov barəsində 4 aylıq həbs qətimkan tədbiri seçilib
Naxçıvan Muxtar Respublikasının Penitensiar Xidmətinin rəisi, ədliyyə general-mayoru Tofiq Həsənov həbs olunub. Onun Dövlət Təhlükəsizliyi Xidmətinin (DTX) İstintaq Baş İdarəsində araşdırılan cinayət işi üzrə həbs olunduğu bildirilir.
Meydan TV-nin əldə etdiyi məlumata görə, Tofiq Həsənov ötən həftəsonu saxlanılıb. Səbail Rayon Məhkəməsində onun barəsində ilkin istintaq dövrü üçün 4 aylıq həbs qətimkan tədbiri seçilib. O, külli miqdarda mənimsəmə, vəzifə səlahiyyətlərindən sui-istifadə etmə kimi əməllərdə ittiham olunur.
Hazırda DTX-nın istintaq təcridxanasında saxlanılan Tofiq Həsənov bu vəzifəyə 2016-cı il sentyabrın 19-da Naxçıvan MR Ali Məclisinin o vaxtkı sədri Vasif Talıbovun sərəncamıyla təyin olunmuşdu. O, eyni zamanda, Naxçıvan MR Ədliyyə nazirinin müavini idi.
O, 2017-ci il noyabrın 29-da Prezident İlham Əliyevin sərəncamıyla general-mayor rütbəsi alıb.
Bundan öncə Naxçıvan MR sabiq maliyyə naziri Rəfael Əliyev, Gömrük Komitəsinin sədri Səhət Həbibbəyli və başqa yüksək vəzifəli şəxslər həbs olunmuşdu.
