Tofiq Yaqublu

Mənbə: Foto: Meydan TV

Başlıq: Tofiq Yaqublu

“Human Rights Watch” Tofiq Yaqublu ilə bağlı bəyanat verib

“Hakimiyyət Yaqublunu dərhal azad etməli, siyasi müxalifətə təzyiqləri dayandırmalıdır”

Human Rights Watch (HRW) beynəlxalq insan hüquqları təşkilatı Azərbaycanda Tofiq Yaqublunun həbsini kəskin şəkildə pisləyib.

Təşkilatın 25 mart tarixli bəyanatında deyilir ki, T.Yaqublu hökuməti tənqid etdiyinə görə uydurma “xuliqanlıq” ittihamı ilə həbs olunub. HRW qeyd edir ki, həbs Azərbaycan prezidenti İlham Əliyevin çıxışından bir neçə gün sonra baş verib:

“Əliyevin çıxışından belə görünürdü ki, koronavirus pandemiyası ilə mübarizə üçün nəzərdə tutulmuş üsullardan müxalifətə divan tutulmasında istifadə olunacaq. Bu, hökumətin söz azadlığına, siyasi tənqidçilərinə nifrətinin daha bir narahatedici göstəricisidir”, - bəyanatda deyilir.

Qurumun Avropa və Orta Asiya üzrə direktoru Giorgi Gogia deyib ki, Azərbaycan hökumətinin tənqidçilərinin susdurmaqdan ötrü saxta ittihamlara əl atması kimi çoxdankı bir davranış nümunəsi mövcuddur və Yaqubluya qarşı iş tamamilə bu davranışa uyğundur.

Martın 22-də saxlanmazdan öncə T.Yaqublu Facebook-da yazıb ki, təxribatla üzləşib:

“8-ci kilometr bazarı”nda park halındakı maşınımı qəsdən, nümayişkaranə şəkildə vurdular və üstümə hücum etdilər. Öyrədilmiş adamlardır”, - o yazıb.

T.Yaqublunun barəsində 3 ay müddətinə həbs qətimkan tədbiri seçilib. Onu 7 ilədək həbs təhlükəsi gözləyir.

Human Rights Watch

Human Rights Watch

Mənbə: Meydan TV

HRW qeyd edir ki, məhkəmənin belə abstrakt və əsassız ittihamlarla T.Yaqublunun barəsində həbs qətimkan tədbiri seçməsi Avropa İnsan Hüquqları Konvensiyasında nəzərdə tutulmuş qanunsuz həbsə qarşı təminatı pozur.

Qurum T.Yaqublunun Şüvəlanda təcridxanasına yerləşdirilməsinin narahatlıq yaratdığını bildirib.

“Bu təcridxana həddən artıq dolu olması, natəmizliyi, zəif işıqlandırılması və zəif havalandırma sistemiylə ad çıxarıb. 2017-ci ildə ölkəyə səfərdən sonra Avropa Şurasının İşgəncələrin Qarşısının Alınması üzrə Komitəsi bu təcridxananın “mümkün qədər tez” bağlanmasını tövsiyə edib”, - bəyanatda deyilir.

“Human Rights Watch” T.Yaqublunun ilk dəfə həbs olunmadığını, onun mütəmadi saxlandığını, pis rəftara məruz qaldığını, siyasi fəaliyyətini dayandırmaq üçün xəbərdarlıq aldığını qeyd edib.

“Hakimiyyət Yaqublunu dərhal azad etməli, siyasi müxalifətə təzyiqləri dayandırmalı, Azərbaycanda yaşayanların səhhəti ilə məşğul olmalı, medianın öz işini azad və təhlükəsiz görməsinə imkan verməlidir”, – bəyanatda vurğulanır.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/ar9rz8

Ən çox baxılan