Azərbaycanda xüsusi karantin rejimi iyulun 20-nə qədər uzadılıb. Bu tarixə qədər Bakı Metropoliteninin fəaliyyəti dayandırılıb. İctimai nəqliyyatdan ancaq avtobuslar işləyir. Adamların çox olduğu vaxtlarda dayanacaqlarda uzun növbələr yaranır.
Dayanacaqlarda sosial məsafəyə riayət olunmasına patrul xidməti nəzarət edir. İyulun 2-dən küçə və prospektlərdə, eyni zamanda həyətlərdə patrulun sayı artırılıb. Şəxsi avtomobildə hərəkət etmək üçün də xüsusi icazə almaq lazımdır.
İyulun 2-dən maskadan istifadə etməməyə görə cərimələr də artıb. Ölkə başçısı tərəfindən İnzibati Xətalar Məcəlləsinə dəyişikliklər edilməsi haqda qanuna əsasən, fiziki şəxslər 100 manat, vəzifəli şəxslər 200 manat, hüquqi şəxslər isə 400 manat həcmində cərimələnir.
