İndi internetin aylıq qiyməti 25 manatdan başlayacaq
Avqustun 15-də axşam Rəqəmsal İnkişaf və Nəqliyyat Nazirliyinə tabe olan “Aztelecom” dövlət telekommunikasiya provayderi davam edən antiinhisar araşdırmalarına baxmayaraq, qiqabit passiv optik şəbəkə (GPON) xidmətlərinin tariflərini artırıb.
Tarif yenilənməsi provayderin saytında əksini tapıb. Bununla istehlakçılara təqdim olunan minimum internet sürəti artırılıb. Beləliklə, minimum trafik sürəti 40 Mbit/s-dən 100 Mbit/s-ə yüksəlib.
Qiymətlərə gəlincə, istehlakçılar ayda 100 Mbit/s üçün 25 manat, 150 Mbit/s-ə 30 manat və 250 Mbit/s-ə 36 manat ödəyəcəklər. Bundan əvvəl 40 Mbit/s sürətli ən aşağı paket 18 manata başa gəlirdi.
Elan Azərbaycan Antiinhisar və İstehlak Bazarına Nəzarət Dövlət Xidmətinin yoxlaması fonunda verilib. Avqustun 14-də agentlik “Aztelecom” və “Baktelecom” dövlət telekommunikasiya provayderlərinin tətbiq etdikləri qiymət dəyişikliklərinin yoxlanılmasına başlayıb. Araşdırmada məqsəd provayderlərin hərəkətlərinin Rəqabət Məcəlləsinə uyğun olub-olmadığını və yeni tariflərin hüquq normalarına uyğun tətbiq edilib-edilmədiyini müəyyən etməkdir.
Araşdırma barədə qərar sahə üzrə ekspertlərin tənqidlərindən sonra qəbul edilib. Onlar dövlət provayderlərinin birtərəfli hərəkətlərindən narahatlıqlarını bildiriblər.
“Aztelecom”un qiymət artımı Azərbaycanın telekommunikasiya bazarında inhisarçı nəzarətilə bağlı narahatlığı artırıb, istehlakçıların hüquqlarının müdafiəsi və bazarın şəffaflığı məsələlərini ön plana çıxarıb.
Araşdırma davam etdiyi üçün onun nəticəsi Azərbaycanın inkişaf edən rəqəmsal məkanında qiymət siyasətinin tənzimlənməsinə dair presedent yarada bilər.
Bir ay öncə ölkə mediasında “Aztelekom” və “Bakı Telefon Rabitəsi”nə istinadən avqustun 15-dən internetin qiymətlərində dəyişiklik olacağı açıqlanmışdı.
Açıqlamada həmin qurumlar bunu müştərilərin yüksəksürətli genişzolaqlı internetə artan tələbatı ilə izah edirlər:
“Bu işlər ölkəmizdə dünya trendləri ilə ayaqlaşma, əhalinin yüksək sürətli internetə olan tələbatında artım tendensiyasını nəzərə alaraq, göstərilən xidmətin keyfiyyətinin yüksəldilməsi və dayanıqlı infrastrukturun təmin edilməsi məqsədilə həyata keçirilir”.
Həmin vaxt Azərbaycan İnternet Forumunun prezidenti Osman Gündüz açıqlama vermişdi ki, hazırda minimal qiymət 18 manat müəyyən olunub və bu ödənişlə vətəndaş 40 Mbit/s sürət əldə edə bilir:
“İndi isə minimal 100 Mbit/s üçün 25 manat olacaq. Görünür, provayderlər, o cümlədən dövlət provayderləri bir anda varlanmaq xətti götürüblər. Baxırlar ki, hamı ölkədə qiymətləri qaldırır, düşünüblər ki, onlar niyə etməməlidirlər”.
