“İcra Hakimiyyəti Ali Məhkəmənin qərarını yerinə yetirmir”
Sumqayıt sakini şəhərin İcra Hakimiyyəti tərəfindən ticarət obyektinin bağlanması ilə bağlı şikayət edib.
Şəhər sakini Zakir İsmayılov yaşadığı 36-cı məhəllə, ev 1/22, mənzil 32 ünvanında açdığı ayaqqabı dükanının bağlanması ilə bağlı məhkəmələrə də müraciət edib.
Ali Məhkəmə şəhər icra hakimiyyətinin bu addımını qanunsuz sayan qərar çıxarsa da, bu qərar yerinə yetirilməyib.
Meydan TV-yə danışan Zakir İsmayılov bildirib ki, dükanı 1995-ci ildə, Şakir Abuşovun icra başısı olduğu dövrdə açıb və evin pəncərə hissəsini qapı edib:
“O zaman dedilər ki, siz dükanı açın, sənədi sonra verərik. Mən də elə etdim. İcra hakimiyyətinin memarlıq şöbəsi gəlib şəkil şəkdi, amma hər dəfə sənəd istəyəndə, bu gün, sabah deyib uzatdılar. Sonra Bakıya göndərdiklərini, ardınca isə hələ sənəd almadıqlarını söylədilər. Nəhayət, bildirdilər ki, səni incidən yoxdursa, dükanını işlət, nə zaman incitsələr gələrsən”.
Onun sözlərinə görə, belə hal 2014-cü ilə qədər davam edib.
Zakir İsmayılov bildirib ki, o zaman Sumqayıt Şəhər İcra Hakimiyyətinə Eldar Əzizov başçı təyin ediləndən sonra, icra hakimiyyətindən gəlib binanı abadlaşdıracaqlarını deyiblər.
“Bu bəhanə ilə bildirdilər ki, qapını saxlamaq istəyirsənsə 12 min manat verəcəksən. Amma mənim o qədər pulum yox idi. Cavab verdilər ki, şəhər icra hakimiyyətinin də pulu yoxdur, obyekt işlədirsinizsə, pul verin və davam edin. Kim pul verdisə, ona toxunmadılar. Amma mənim kimi pul verməyənlərin qapısını bağlayıb, yenidən pəncərəni açdılar. Səbəb kimi də göstərdilər ki, binanın memarlığına uyğun deyil. Sual verdim ki, bəs o biri dükanlarda da uyğun deyil, niyə toxunmursunuz, cavab vermədilər”.
Zakir İsmayılov Mənzil Məcəlləsinin 21-ci maddəsini əsas gətirib müvafiq orqanlara məktub yazdığını xatırlatdı:
“Məcəllədə göstərilir ki, vətəndaş öz yaşayış sahəsini qeyri-yaşayış sahəsinə keçirə bilər. Ancaq icra başçısının müavini Sahib Quliyev rekonstruksiyanı əsas gətirib, yenə icazə vermədi. Halbuki, Sumqayıtda bu cür binaların birinci mərtəbəsində dükan açanlar çoxdur. Necə oldu ki, onlara rekonstruksiya tətbiq olunmur, amma mənə çatanda yada düşür? Hamısında qapı var, yalnız məndə pəncərədir. İcra hakimiyyətinin rəsmiləri binanın yaxşı görkəmindən danışırlarsa, hamısı qapı, biri isə pəncərə olanda hansı görkəm yaranır?”
Zakir İsmayılov iddia edib ki, onunla bağlı sənədlər saxtalaşdırılıb:
“Ali Məhkəmə lehimə 2017-ci ilin martında qərar verib, sentyabra qədər icra hakimiyyəti qərarı icra etmədiyinə görə Sumqayıt İnzibati İqtisad Məhkəməsinin hakimi Zaur Pirverdiyev icra vərəqəsi açıb icra idarəsinə göndərir. Amma 10 ay icra hakimiyyəti Ali Məhkəmənin qərarını icra etmədiyi üçün icra idarəsi şəhər məhkəməsinə məktub göndərir ki, icra hakimiyyəti məsuliyyətə cəlb olunsun. O zaman şəhər məhkəməsinin sədri Zeyqəm Hüseynov idi, prosesi də özü aparırdı. Təsəvvür edin ki, şəhər məhkəməsinə 2018-ci ilin iyununda 2017-ci ilin tarixi ilə qərarını gətirib elə tərtib etdilər ki, guya Zaur Pirverdiyevin icra vərəqəsindən əvvəl hazırlanıb”.
Onun sözlərinə görə, bundan başqa icra hakimiyyətinin müavini Faiq Kərimov 2018-ci ilin iyununda artıq işdən azad edilmişdi, amma sənədi avqusta tərtib edib onun imzasını qoyublar.
“Mən sənədi Faiq Kərimova göstərdim. O imzasının saxtalaşdırıldığını söylədi. Bu məsələdə Eldar Əzizovun vaxtından çalışan icra başçısının müavini Sahib Quliyev məsuliyyət daşıyır. Çünki bütün məktublara o cavab verir. Mən ona Ali Məhkəmənin qərarını göstərsəm də, öz dediyinin üstündə dayandı. Təsəvvür edin ki, Ali Məhkəmənin qərarını məruzə edirlər, amma buna baxmayaraq keçmiş müavinin imzasını saxtalaşdırıb qərar çıxardırlar, tarixi də səhv yazırlar”.
Zakir İsmayılov Ali Məhkəmənin qərarının yerinə yetirilmədiyi və sənəd saxtalaşdırıldığına görə Prezidentin Hüquq mühafizə orqanları ilə iş və hərbi məsələlər üzrə köməkçisi, şöbə müdiri Fuad Ələsgərova və Baş prokuror Zakir Qaralova müraciət edəcəyini bildirib:
“Prezident dəfələrlə sahibkarlığa dəstəyin vacibliyini və məmurların xalqın xidmətçisi olduğunu vurğulayıb. Ancaq şəhər icra hakimiyyətinin Ali Məhkəmənin qərarına bu münasibətini görəndən sonra gələcəyə ümidsizlik yaranır”.
Sumqayıt Şəhər İcra Hakimiyyətinin mətbuat xidmətindən bildirdilər ki, Zakir İsmayılov icra başçısının Qəbul Şöbəsinə yazılsın və məktubla müraciət etsin:
“Məktubuna Ali Məhkəmənin qərarını da əlavə etsin. Şəhər İcra Hakimiyyətində bütün vətəndaşlar dinlənilir və problemləri həll edilir”.
