Siyasi məhbuslar və onların mübarizə apardıqları ideyaları arasındakı məsafə nə qədərdir?
Hüquq müdafiəçisi Rəsul Cəfərovun həbsi ilə yarımçıq qalmış “Məsafə” layihəsi, fotoqraf Jahangir Yusifin də iştirakı ilə birlikdə bərpa edilib. Bu barədə Meydan TV-yə Jahangir Yusif məlumat verib. Bildirib ki, Rəsul Cəfərov rəhbəri olduğu layihəni həbsdən çıxdıqdan sonra yenidən həyata keçirməklə bağlı fəaliyyətə başlayıb: “2016-cı ilin yazından lahiyə üzərində iş başladı. Çəkilişlər və digər əlaqəli proseslər oktyabrdan yekunlaşdı”.
“Layihə, Azərbaycanda siyasi fəaliyyətindən dolayı repressiya ilə üzləşmiş, həbs edilmiş siyasi məhbuslar və onların ailə üzvlərinin yaşadıqlarından bəhs edir. Hətta layihədə azadlığa çıxanlar, onların ailə üzvlərinin yaşadıqları da əksini tapıb”.
J. Yusif deyir ki, “Məsafə” avtoritar, qapalı cəmiyyət ilə azad, sivil toplum arasındakı mübarizəni ifadə edir. Layihə, bu mübarizəni aparan, siyasi kimliklərindən və vətəndaş məsuliyyətindən imtina etməmiş insanların yaşadıqları, keçdikləri prosesi göstərir:
“Bu ağır prosesdə siyasi məhbuslar və onların uğrunda mübarizə apardıqları ideyalar arasındakı məsafəni, öz doğmaları ilə üzləşdikləri repressiyalardan dolayı yaşadıqları məsafəni təmsil edir”.
Hüquq müdafiəçisi Rəsul Cəfərov 2014-cü ilin avqustunda həbs edilmişdi. 2016-cı il martın 18-də azadlığa çıxıb.
