“Sabah” isə turnirlə vidalaşıb
Azərbaycanın “Sabah” və “Zirə” komandaları avqustun 15-də UEFA Konfrans Liqasının 3-cü təsnifat mərhələsində cavab oyunlarını keçiriblər.
“Sabah” Masazırdakı stadionunda İrlandiyanın “Sent-Patriks Atletik” komandasını qəbul edib. Azərbaycan təmsilçisi səfərdəki matçda rəqibinə 0:1 hesabı ilə məğlub olmuşdu.
Qarşılaşma saat 20:00-da start götürüb. Oyun “Sabah”ın 0:1 hesablı məğlubiyyəti ilə başa çatıb. Bununla da, “Sabah” Konfrans Liqasında mübarizəni dayandırıb.
“Zirə” isə Bakıda Xorvatiyanın “Osiyek” klubu ilə üz-üzə gəlib. Xorvatiyada keçirilmiş ilk oyunda 1:1 hesablı heç-heçə qeydə alınmışdı.
Saat 20:30-da başlayan cavab matçının əsas və əlavə vaxtında qalib müəyyənləşməyib – 2:2. Belədə, penaltilər seriyasına ehtiyac duyulub. Penalti zərbələrini daha dəqiq yerinə yetirən “Zirə” tarixində ilk dəfə Konfrans Liqasının pley-offuna yüksəlib.
“Zirə” Konfrans Liqasının pley-off mərhələsində Kiprin “Omoniya” klubu ilə qarşılaşacaq.
