Şamaxının mərkəzindən təxminən 40 km aralıda, dəniz səviyyəsindən 1800 m hündürlükdə Zarat Xeybəri kəndi yerləşir. Bura Şamaxının ən ucqar kəndlərindən biridir. Kəndin əhalisinin əksəriyyəti tatdır. Burada yaşayan insanlar uzun illərdir ki, təbii qaz üzünə həsrətdirlər. Təxminən 150-yə yaxın sakini olan kənddə tibb məntəqəsi belə yoxdur. Qışda isə ümumiyyətlə yolu keçilməz olur. Həftədə bir dəfə Şamaxının mərkəzinə bazarlığa gəlmək üçün xüsusi UAZ, yaxud Niva maşınları fəaliyyət göstərir ki, onun da qiyməti adambaşına 10 manatdır. Qayıdış üçün də əlavə 10 manat ödəmək lazım gəlir.
