Nizami Abbasov 40 ildən çoxdur ki, ağac üzərində oyma sənəti ilə məşğuldur. Gəncədə yaşayıb-yaradan ustanın işlərinin içində şair və yazıçıların büst və portretləri üstünlük təşkil etsə də, hərbi-vətənpərvərlik və təbiət mövzularına da yer ayırıb.
Nizami Abbasov deyir ki, bir işə başlamazdan öncə hazırlayacağı iş haqqında daha çox məlumat toplayır. Kitablar oxuyur, varsa filmlərinə baxır. Daha sonra işə başlayır. “Nizami Gəncəvinin “Xəmsə”-sini demək olar ki, əzbər bilirəm. Bu “Xəmsə”-nin üzərində iki il işləməklə hazırlaya bildim”-deyir.
Nizami Abbasov əl işlərində qoz, şabalıd, fıstıq və armud ağaclarından istifadə edir. Bundan başqa, əl işlərində “göz” obrazına üstünlük verir.
Sifariş üçün iş görmədiyini deyən Nizami Abbasov əsərlərini daha çox sərgi üçün hazırlayır. İstəyir ki, daha çox adamın məlumatı olsun:
“Satış məqsədi ilə sifariş götürmürəm. Daha çox öz istədiyim və hazırladığım işləri satıram. O zaman hazırlayacağım iş daha keyfiyyətli, daha məzmunlu olur. Hazırladığım işin qiyməti də ölçü və məzmuna görə fərqlənir”.
