Kremlin sözçüsü Dmitri Peskov Vladimir Putin və Nikol Paşinyanın Rusiya sərhədçilərinin Ermənistanın Azərbaycanla sərhəd ərazilərindən çıxarılması ilə bağlı razılaşmasını təsdiqləyib.
Onun sözlərinə görə, Yerevanın tələbi ilə Rusiya sərhədçiləri İran və Türkiyə ilə sərhəddə qalacaqlar.
D.Peskov bildirib ki, Putinlə Paşinyan arasında görüşdə əsasən ticarət-iqtisadi əlaqələrimizin inkişafının müsbət dinamikası müzakirə olunub.
Rusiya hərbçilərinin bundan sonra “Zvartnots” hava limanında xidmət aparmayacaqlarına dair razılaşma olduğu bildirilir
Mayın 8-də Kremldə Ermənistanın Baş naziri Nikol Paşinyan Rusiyanın Prezidenti Vladimir Putinlə görüşüb. Vladimir Putin 2015-ci ildən Ermənistanın Avrasiya İqtisadi Birliyi ölkələri ilə ticarət dövriyyəsinin 14 dəfə artdığını vurğulayaraq əlavə edib ki, ikitərəfli münasibətlər çox uğurla inkişaf edir:
“Biz həmişə, ilk növbədə, iqtisadi əməkdaşlığa diqqət yetiririk. Son bir ildə ticarət dövriyyəsinin artımı çox mühüm məbləğ təşkil edib və bu, əsasən idxalın artması ilə bağlıdır. Ticarət dövriyyəsi isə 7 milyard dolları ötüb, əlaqələrimizdə əvvəllər belə həcm olmayıb”.
“Təbii ki, təkcə ticarət dövriyyəsinin artımı ilə bağlı məsələlər yoxdur. Regionda təhlükəsizliyə dair suallar var. İndi biz bu barədə açıq şəkildə danışmayacağıq, lakin Avrasiya Birliyinin kənarında, əlbəttə ki, münasibətlərimizin bütün kompleksi haqqında, o cümlədən regional təhlükəsizlik məsələlərinə toxunmaq imkanı var”.
Nikol Paşinyan sonuncu görüşlərinin 2023-cü ilin dekabrında olduğunu bildirib:
“O vaxtdan bəri, əlbəttə ki, müzakirə edilməli suallar yığılıb. Təbii ki, biz Şuranın iclasında artıq iqtisadi bloku müzakirə etmişik. İndi də ümid edirəm və əminəm ki, biz ikitərəfli münasibətləri və regional məsələləri müzakirə edəcəyik”.
Kremlin sözçüsü Dmitri Peskov yerli mediaya deyib ki, danışıqlar gələcək münasibətlərin perspektivlərinə əsasən müsbətdir. O qeyd edib ki, Ermənistanla münasibətlərdə bəzi çətinliklər yaranır, lakin liderlərin bunu müzakirə etmək üçün siyasi iradəsi var:
“Danışıqların nəticələrini gözləyəcəyik, bu dialoqun davam etdirilməsi üçün siyasi iradə var, daha çox nikbin olmağa meyllidirlər”.
“Söhbətin mürəkkəbliyini şişirtməyə ehtiyac yoxdur, əlbəttə ki, ikitərəfli münasibətlərimizdə müəyyən problemli mövzular var. Lakin iki ölkə arasında qarşılıqlı əlaqə nə qədər sıx olarsa, ikitərəfli münasibətlər də bir o qədər genişlənir və daha tez-tez orada müxtəlif problemlər yaranır”, – deyə Peskov əlavə edib.
“Bagramyan26” Telegram kanalının məlumatına görə, ölkə başçıları Rusiya hərbçilərinin bundan sonra “Zvartnots” hava limanında xidmət aparmayacaqlarına dair razılaşıblar:
“Bundan əlavə, Rusiya hərbçiləri 44 günlük müharibədən sonra şifahi razılaşma əsasında yerləşdikləri Sünik, Vayots Dzor, Geqarkunik, Ararat, Tavuşdakı məntəqələrini tərk edəcəklər”.
Aprelin 20-də Ermənistan lideri Nikol Paşinyan Rusiya sərhədçilərinin Tavuşdakı postları tərk edəcəklərini bildirmişdi.
Eyni zamanda, aprelin 27-də Ermənistan parlamentinin spikeri Alen Simonyan Rusiya sərhədçilərinin bu ilin avqustunda sözügedən hava limanından çıxacaqlarını açıqlamışdı.
