Zaxarova deyir ki, Yerevana nota verilib
Rusiya Xarici İşlər Nazirliyi Ermənistan nümayəndə heyətinin Ukraynanın Buça şəhərinə səfərindən narazılığını bildirib.
Bu barədə nazirliyin rəsmisi Mariya Zaxarova iyunun 9-da Yerevana nota verdiklərini deyib.
Onun sözlərinə görə, Moskva erməni nümayəndələrinin Ukraynanın bu şəhərinə səfərini, eləcə də Rusiyaya ünvanlanan qəbuledilməz bəyanatları və Kiyevə humanitar yardımın göstərilməsini qeyri-dost addım kimi qiymətləndirir:
“Biz Nor-Nork vilayətinin rəhbəri Tiqran Ter-Marqaryan və Ermənistan səfiri Vladimir Karapetyanın Buçaya səfərini rəsmi Yerevanın açıq-aşkar qeyri-dost addımı kimi qiymətləndiririk. Onların Ukrayna Silahlı Qüvvələrinin ehtiyaclarına yardım ötürməsindən və orada Rusiyaya qarşı qəbuledilməz bəyanatlardan narahatıq. Biz Ermənistan Xarici İşlər Nazirliyinə etiraz notası göndərdik”.
![](https://d9mc3ts4czbpr.cloudfront.net/wp-content/uploads/img_0357_720.jpg)
Mariya Zaxarovanın sözlərinə görə, Nor-Nork inzibati dairəsinin rəhbəri Tiqran Ter-Marqaryan “qərbyönlü” Respublika Partiyasının sədri Aram Sarkisyanın silahdaşıdır:
“Buna görə də onun reaksiyası tamamilə başa düşüləndir”.
XİN rəsmisi həmçinin Ermənistan hakimiyyətinin bu cür bəyanatlarla razılaşmasını qəbuledilməz adlandırıb.
Tiqran Ter-Marqaryan və Ermənistan səfiri Vladimir Karapetyan iyunun 2-də Buçaya səfər ediblər.
Bundan əvvəl Zaxarova erməni parlamentariləri Kiyevin onlara verdiyi Buçada öldürüldüyü iddia edilən şəxslərin siyahısını bölüşməyə çağırmışdı.
Ermənistanın rəsmi orqanları Rusiya XİN-nin notasına hələ ki reaksiya verməyiblər.
2022-ci ildə Rusiyanın Ukraynaya hücumu zamanı rus qoşunları Buça şəhərinə daxil olarkən dinc əhalinin kütləvi şəkildə öldürülməsi faktları aşkar edilib.
Rusiya Müdafiə Nazirliyi isə bu faktları “dezinformasiya” adlandırıb.