Əlilliyi olan şəxslər

Mənbə: Foto: arxiv

Başlıq: Əlilliyi olan şəxslər

Əlilliyi olan şəxslər İlham Əliyevə müraciət etdi

Ümumi səbəbrən əlil olan şəxslər də güzəştli mənzil sahibi olmaq istəyirlər

Əlilliyi olan şəxslər güzəştli mənzil sahibi olmaq istəyirlər. Bunun üçün onlar Prezident İlham Əliyevə müraciət ediblər.

Həmin müraciətdə deyilir ki, bu gün xeyli sayda mənzilə və mənzil şəraitinin yaxşılaşdırılmasına ehtiyacı olan ümumi səbəbdən əlilliyi olan şəxslər və əlilliyi olan uşaqların ailələri var.

“Son illərdə “sosial evlər” deyilən layihəyə ümid bağlasaq da, həmin layihə “güzəştli mənzil” olaraq davam etdirildi. Təəssüf ki, biz həmin güzəştli mənzil almaq hüququ olanlar sırasına daxil edilmədik”.

Müraciətdə bildirilir ki, əlilliyi olan insanlar heç bir dövlət mənzil proqramında nəzərə alınmayıb. Bu da Azərbaycan Respublikası Konstitusiyasının 43-cü maddəsinin (Mənzil hüququ) II bəndinə və dövlətin qarşısında öhdəlik götürdüyü “BMT-nin Əlillərin hüquqları haqqında Konvensiya”nın, Maddə 28-də nəzərdə tutulmuş müddəalarına ziddir:

“Əlillərin dövlət mənzil proqramlarından istifadə etmək imkanları təmin edilməlidir. Əksər əlilliyi olan şəxslər və əlilliyi olan uşaqları olan ailələr öz yaşayış yerini, harada və kiminlə yaşamağı seçmək imkanına malik deyil. Əlillər digər insanlarla bərabər səviyyədə öz yaşayış yerini, harada və kiminlə yaşamağı seçmək imkanına malik olsunlar və hansısa bir yaşayış yerində yaşamağa məcbur olmasınlar”.

Müraciətdə o da deyilir ki, əlilliyi olan şəxslər və əlilliyi olan uşaqların ailələri cəmiyyətin ən aztəminatlı və sosial müdafiəyə ən çox ehtiyacı olan təbəqəsidir. Və onların bu gün ən çox üzləşdikləri problem mənzil şəraitlərinin normal olmamasıdır:

“Xüsusilə hərəkət məhdudiyyətli kreslo-araba istifadəçilərinin əksəriyyəti darısqal, onların ehtiyaclarına uyğunlaşdırılmayan mənzillərdə yaşayırlar. Həmin mənzillərdə kreslo-araba ilə hamam otaqları və ayaqyollarından istifadə demək olar mümkünsüzdür”.

Müraciətdə deyilir ki, kreslo-araba və hərəkət məhdudiyyətli şəxsə lazım olan digər avadanlıqlar mənzildə xeyli yer tutur. Çoxunun yaşadığı mənzil çox kiçikdir:

“Hətta binaların əksəriyyətində liftlərin girişi ensizdir. Ora kreslo-araba ilə daxil olmaq mümkün olmur. Bu liftlərin çoxu mərtəbələr arasında yerləşdiyindən mənzildən çıxıb həmin liftə daxil olmaq üçün pilləkənlərlə ya yarım mərtəbə aşağı enmək, ya da yuxarı qalxmaq lazımdır. Mənzildən müəyyən köməklə çıxa bilsək də, həmin pilləkənlərdən enmək mümkünsüz olur. Bunun üçün ən az 3-4 nəfər qüvvəli adamın köməyinə ehtiyacımız yaranır. Xahiş edirik, bu problemlərimizin həllində bizə kömək olasınız”.

Əlilliyi olan şəxslər prezidentdən bütün bunları nəzərə alaraq, müvafiq tədbirlər görülməsi üçün tapşırıq verməsini istəyirlər:

  1. Ümumi səbəbdən əlilliyi olan şəxslərin və əlilliyi olan uşaqların ailələrinin mənzillə təminatı ilə bağlı Dövlət Proqramı hazırlansın və təsdiq edilsin;
  2. Ümumi səbəbdən əlilliyi olan şəxslərin və əlilliyi olan uşaqların ailələrinin mənzillə təminatı ilə bağlı Mənzil Məcəlləsinə müvafiq maddələr əlavə edilsin”
  3. Mənzil şəraitinin yaxşılaşdırılmasına ehtiyacı olan ümumi səbəbdən əlilliyi olan şəxslər və əlilliyi olan uşaqların ailələrinin müəyyən edilməsi üçün meyarlar hazırlansın”
  4. Mənzilə və mənzil şəraitinin yaxşılaşdırılmasına ehtiyacı olan ümumi səbəbdən əlilliyi olan şəxslər və əlilliyi olan uşaqların ailələri üçün güzəştli şərtlərlə, yəni bizim üçün əlçatan qiymətə mənzillər ayrılsın; Yaxud da sosial mənzillər ayrılaraq, sonradan özəlləşdirilməsinə imkan yaradılsın;
  5. Ümumi səbəbdən əlilliyi olan şəxslərin və əlilliyi olan uşaqların ailələrinin cəmiyyətdən təcrid edilməsinin qarşısını almaq və cəmiyyətə sürətli inteqrasiya etməsinə şərait yaratmaq üçün bu məqsədlə ayrılan mənzillərin sayı müxtəlif yaşayış binalarında mövcud mənzillərin 10-20% nisbətində olmaqla müəyyən edilsin. 10-20% nisbətinin özündə də müxtəlif əlilliyi olan şəxslər nəzərdə tutulmalıdır.
Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/zpiu4h

Ən çox baxılan