”Əli ayağı” ziyarətgahında

Bakının Buzovna kəndində hər kəsin “Əli ayağı” adı ilə tanıdığı ziyarətgah yerləşir. Bakıdan təxminən 40 km uzaqlıqdadır.

Çoxunun inanc yerinə çevrilən bu ziyarətgaha hər gün onlarla insan gəlir. Azərbaycanın ucqar regionlarından başqa, müxtəlif ölkələrdən də gəlib ziyarət edirlər.

Rəvayətlərə görə, hicri tarixi ilə 13-cü ildə Abşerona Ərəbistandan bir dəstə süvari gəlir, onlar hər yeri gəzib dolaşır, heç kimlə kəlmə kəsmirlər.

Onlardan kim olduqlarını soruşduqda, hər biri özünü “başçı” kimi təqdim edirmiş. Həmin dövrdə Badi-Kubədən iki qardaş Məkkə və Mədinə şəhərlərində ticarətlə məşğul imişlər. Qardaşlardan biri – Yassal Niyyal Məkkə və Mədinədə qalır, kiçik qardaş isə oraya mal aparıb gətirirmiş və görkəmli adamların demək olar ki, hamısını tanıyırmış. Bir gün həmin süvari dəstəsi Buzovnada qayaların üstünə çıxarkən, dəniz kənarında balıqçılarla alver edən kiçik qardaş onları görür və qəfildən qaçıb atlılardan birinin ayağına düşür: “Ya Həzrət Əli, siz burada neyləyirsiniz?!” Bu zaman həmin atlının bir ayağı yerdə, digəri isə üzəngidə imiş. Atlı ondan soruşur ki, məni haradan tanıdın? Kiçik qardaş da Məkkədə, Mədinədə alverlə məşğul olduğunu, onu oradan görüb, tanıdığını deyir. Həmin adam atına minib dəstəylə birlikdə oradan uzaqlaşır. O, getdikdən sonra qayanın üzərində ayaq ləpiri, at dırnaqlarının yeri qalır. Deyilənə görə, həmin adam Həzrəti Əli imiş. O vaxtdan bu yer “Əli ayağı” ziyarətgahı sayılır və o gündən bu günədək bura insan axını davam edir.