Energetika Nazirliyi ziyafət təşkili üçün Baş nazirin ailəsinə məxsus “Manqal” MMC ilə müqavilə imzalayıb.
İlk baxışda sıradan bir ziyafət təşkili kimi görünən bu satınalmanın pərdəarxası rəqəmlər, şirkət profilləri və yüksəkçinli məmurların biznes şəbəkəsinə çıxan izlərlə zəngindir.
Dövlət satınalmalarının vahid internet portalından əldə edilən məlumatlara görə, Energetika Nazirliyi ziyafət təşkili üçün tender müsabiqəsi keçirməyə ehtiyac duymayıb. Nazirlik “bir mənbədən satınalma” metoduna üstünlük verərək birbaşa “Manqal” MMC ilə anlaşıb.
“Bir mənbədən satınalma” metodu bazarda rəqabət mühiti yaradılmadan, birbaşa tək bir şirkətlə müqavilə bağlanması deməkdir. Bu metod tətbiq edildikdə satınalmanın spesifik detalları, qiymətləndirmə meyarları və xidmətin tam mahiyyəti ictimaiyyətə açıqlanmır, bu da şəffaflıq dumanı yaradır.
Müqavilənin şərtlərinə əsasən, nazirliyin sifarişi ilə təşkil olunacaq ziyafət müqabilində şirkətə dövlət büdcəsindən 6 480 manat vəsait ödəniləcək.
2017-ci ildə dövlət qeydiyyatına alınan “Manqal” MMC-nin hüquqi ünvanı Səbail rayonu, Aydın Nəsirov, ev 11 olaraq qeydiyyata alınıb. Şirkətin qanuni təmsilçisi hazırda Elşən Qayıtmazovdur. Lakin şirkətlə bağlı ən diqqətçəkən məqamlardan biri onun nizamnamə kapitalıdır.
“Astronomik” nizamnamə kapitalı
Azərbaycanda xidmət və iaşə sektorunda fəaliyyət göstərən bir çox MMC-lərin nizamnamə kapitalı simvolik olaraq 10-100 manat civarında olduğu halda, “Manqal” MMC-nin nizamnamə kapitalı rekord həddə – 19 milyon 100 min 10 manat təşkil edir. Restoran fəaliyyəti göstərən bir qurum üçün bu qədər nəhəng kapitalın olması, şirkətin arxasında daha böyük maliyyə dövriyyəsinin dayandığına işarədir.
Dövlət Vergi Xidmətinin reyestr məlumatları dərindən araşdırıldıqda, şirkətin rəsmi idarəçiliyində maraqlı adlar ortaya çıxır: Təsisçi: Xəyal Adil oğlu Hacı-Qədirov, keçmiş Qanuni Təmsilçi isə Niyaz Ravil oğlu Orucov.
Niyaz Orucov kimdir?
Mediada gedən araşdırmalarda, xüsusilə Meydan TV-nin araşdırmalarında N.Orucovun adı ölkənin tikinti və iaşə sektorunda böyük layihələr icra edən “Azİmport” şirkəti ilə yanaşı çəkilir. O, bu şirkətdə baş mühasib vəzifəsini icra edib.
Sözügedən biznes zəncirinin ən yuxarı halqası isə birbaşa hökumətin rəhbərliyinə bağlanır. Müstəqil araşdırmaçı jurnalistlərin hesabatlarında, eləcə də hökumətə yaxın media orqanlarının sızdırdığı məlumatlarda “Azİmport” şirkətinin və “Manqal” restoranlar şəbəkəsinin Baş nazir Əli Əsədovun ailə biznesinə aid olduğu qeyd olunub.
Araşdırmalar göstərir ki, Energetika Nazirliyi ilə bağlanan bu müqavilə istisna deyil. “Manqal” MMC müvafiq xidmət sferası üzrə mütəmadi olaraq müxtəlif dövlət qurumlarının və nazirliklərin elan etdiyi satınalmaların qalibi olur. Şirkətin dövlət sifarişləri hesabına davamlı olaraq irimiqyaslı ziyafətlər və rəsmi tədbirlər təşkil etməsi, onun dövlət satınalmaları bazarında imtiyazlı bir mövqeyə sahib olduğundan xəbər verir.
Energetika Nazirliyinin keçirdiyi bu kiçikhəcmli, lakin simvolik olaraq böyük məna kəsb edən satınalma, Azərbaycandakı “məmura məxsus bizneslərin dövlət tərəfindən bəslənməsi” tendensiyasının növbəti nümunəsidir. İctimai vəsaitlərin tender rəqabəti olmadan, birbaşa baş nazirin adı ilə əlaqələndirilən bir şəbəkəyə yönəldilməsi, dövlət satınalmalarında şəffaflıq və maraqların toqquşması məsələsini yenidən gündəmə gətirir.
