Fərmanın yeni variantında əvvəllər viza tələb olunan istisnalar artıq mövcud deyil
Oktyabrın 10-dan Rusiya Prezidenti Vladimir Putin Gürcüstanın bütün vətəndaşları üçün vizasız rejim şərtlərini genişləndirib. Əvvəllər Gürcüstan vətəndaşları Rusiyaya 90 günlük gedə bilərdi. Lakin bu, Rusiyaya “işləmək” və ya oxumaq məqsədi ilə gələnlərə aid edilmirdi. İndi onlar üçün də məhdudiyyətlər götürülüb. Rusiya Federasiyasının hüquqi aktları portalında dərc edilmiş fərmanın yeni variantında əvvəllər viza tələb olunan istisnalar artıq mövcud deyil.
Fərman dərc edildiyi gündən qüvvəyə minir və indi göstərilən kateqoriyadan olan vətəndaşlar “şəxsiyyətini təsdiq edən etibarlı sənədlər (Gürcüstan vətəndaşının pasportu, diplomatik pasport, xidməti pasport, dənizçi kitabçası, səyahət sənədi) əsasında Rusiyaya gedə bilərlər.
2023-cü il mayın 10-da Rusiya Prezidenti Vladimir Putin 2019-cu ildə Moskvanın təşəbbüsü ilə ləğv edilmiş Gürcüstanla birbaşa aviareyslərə qoyulan qadağanı aradan qaldırıb, həmçinin həmin il mayın 15-də vizanın ləğvi ilə bağlı fərman verib.
Rusiya 2000-ci ildən birtərəfli qaydada Gürcüstan vətəndaşları üçün viza rejimi tətbiq edirdi. Rəsmi Tbilisi daha sonra oxşar tədbirlə cavab verdi. 2004-cü ildə ruslar üçün viza rejimi sadələşdirildi: vizalar Gürcüstana gəldikdən sonra (hava limanlarında və ya sərhəd keçid məntəqələrində) verilməyə başladı. 2008-ci ilin avqust müharibəsindən sonra münasibətlərin pisləşməsinə və Moskva ilə Tbilisi arasında diplomatik münasibətlərin kəsilməsinə baxmayaraq, 2012-ci ilin əvvəlində Gürcüstan ruslar üçün vizanı tamamilə ləğv etdi. İlkin olaraq Rusiya vətəndaşları Gürcüstana vizasız daxil olmaq və ölkədə 90 gün qalmaq imkanı əldə ediblər. Lakin bu gün bu müddət 1 ilə qədər artırılıb.
