Lerikin Boykəndil kəndində 180 yerlik məktəb

Источник: Foto: Meydan TV

Başlıq: Lerikin Boykəndil kəndində 180 yerlik məktəb

Məktəb binasının tikintisində çalışmış fəhlələr 4 ildir maaşlarını ala bilmir

Fəhlələr: “Uşağı ac yatan əliqabarlı fəhlənin haqqını yeyən məmur bir gün qan qusar”

“6 il əvvəl məktəb binasının tikintisinə başlamışıq, 4 il əvvəl işlər dayandırıldı. Bizə olan son ayların borcu ödənilmədi. Ötən 4 ildə icra hakimiyyətinə, prokurorluğa, polisə gedib-gələn fəhlələrdən dördü artıq həyatda yoxdur. Sağlıqlarında zəhməthaqlarını ala bilmədilər, onlara çatacaq pulları öləndən sonra gətirib ailələrinə verdilər, kəfənə, qəbirə xərcləndi. Evində ac, xəstə balaları olan əli qabarlı fəhlənin pulunu necə mənimsəmək olar? Allah bu boyda haqsızlığı götürməz”.

2014-cü ildə Lerikin Boykəndil kəndində 180 yerlik məktəb tikintisinə başlanılıb. 2016-cı ildə tikinti dayandırılıb, aylarla maaşları ödənilməyən fəhlələrəsə bildirilib ki, maliyyə tükənib, növbəti dəfə pul ayrılanda maaşları veriləcək. 4 il keçib, təxminən 30 fəhlənin maaşı hələ də ödənilməyib. 4 ildir ki, fəhlələrin yazmadıqları qurum, döymədikləri qapı qalmayıb. Məktəb tikintisində fəhləlik edənlərdən biri də elə həmin kəndin sakini İman Əliyev olub. O, istinad divarlarının hörgüsündə, dam örtüyünün quraşdırılmasında və sair işlərdə çalışdığını deyir. Meydan TV-yə danışır ki, hər fəhlənin məvacibi gördüyü işlərin həcminə görə hesablandığından zəhməthaqqının məbləği də hər ay dəyişirmiş. İddia edir ki, gördüyü işə görə tikinti şirkətinin ona olan borcu 4.440 manatdır.

“İş icraçısı telefonu söndürüb ortadan itdi”

“2016-cı ilə qədər pullarımız hissə-hissə də olsa, verilirdi. Son 4-5 ayın maaşını vermədilər. Nazir Quliyev vardı, bizi işlədən şirkətin iş icraçısı idi, maaş işinə də o baxırdı. Hər dəfə deyirdi, pul bu gün gəlir, sabah gəlir, beləcə başımızı aldadıb 3-4 ay pulsuz işlətdilər. Fəhlə babalarıq, hər günümüzü ümidlə gəlirdik işləməyə ki, bəlkə bu gün evə nəsə apara bildik. Bir gün dedilər ki, işlər dayandırılır, daha gəlməyin, pul olanda çağırıb borcunuzu ödəyəcəyik. Tez-tez Nazir Quliyevə zəng edirdik, əvvəllər zənglərimizə cavab verirdi, hər dəfə də deyirdi, səbrli olun, sabah pul olacaq. Qəfil bu adam da telefonu söndürüb ortadan yox oldu”, - şikayətçi deyir.

“Başçı dedi, günah sizdədir, müqaviləsiz işləməzdiz”

İman Əliyevin sözlərinə görə, hələ tikintidə işə başlayanda müqavilə bağlamaq adıyla fəhlələrdən şəxsiyyət vəsiqələrini yığıblar. Bir neçə gün sonra özlərinə qaytaranda bildiriblər ki, hər biriylə müqavilə bağlanıb:

“Bizə müqavilə-filan göstərmədilər, heç yerə imza da atmamışıq. Eləcə şəxsiyyət vəsiqələrimizi götürüb, bir neçə gündən sonra özümüzə qaytaranda dedilər ki, müqavilələriniz bağlandı. Heç şirkətin adını da düz-əməlli demirdilər. Gah “Amal” MMC, gah “Mükəmməl” MMC, gah “A-Construction” MMC deyirdilər. Başqa bir-iki şirkət adı da çəkilirdi, yadımda qalmayıb. Bircə onu bilirik ki, işin başında icra başçımızın qardaşı dayanırdı. Ancaq sonradan başçının yanına gedəndə bizə deyirdi, günah özünüzdədir, müqaviləsiz işləməyəydiniz. 4 ildir ki, döymədiyimiz idarə qapısı, yazmadığımız ünvan qalımayıb. Prezidentə, vitse-prezidentə, prokurorluğa, polisə, icra hakimiyyətinə, məhkəməyə - hər yerə yazmışıq. Məhkəmə də işimizə baxmadı ki, ortada müqavilə yoxdu. Bizi aldadıblar, qanundan, hüquqdan, müqavilədən anlayışımız olsaydı, gedib vəkil işləyərdik, suvaqçı, bənnaçı olmazdıq”.

"Hələ tikintidə işə başlayanda müqavilə bağlamaq adıyla fəhlələrdən şəxsiyyət vəsiqələrini yığıblar"

"Hələ tikintidə işə başlayanda müqavilə bağlamaq adıyla fəhlələrdən şəxsiyyət vəsiqələrini yığıblar"

Источник: Meydan TV

İman Əliyev bildirir ki, 20-yə yaxın fəhlənin ümumilikdə 40 min manatdan çox alacağı var.

“Pullar göyə sovrulub”

Məktəb binasının tikintisində fəhləlik edənlərdən biri də Həsrət Allahverdiyev olub. Deyir, tikinti işlərinin 90 faizini onlar yerinə yetirib. Hətta binanın içərisindəki suvaq və divarların ağardılması işlərini də görüblər. Ancaq gördükləri işlərin haqqını illərdir ki, ala bilmirlər:

“50-dən çox fəhləni “sizinlə müqavilə bağladıq” deyib, 2 il müqaviləsiz işlədiblər, vergidən yayınıblar, üstəlik, aylarla yığılıb qalan pullarını da mənimsəyiblər. Pullar göyə sovrulub, bunu araşdıran yoxdur. Əvvəllər fəhlələrin çoxu şikayətçi idi, ancaq sonralar hərə bir tərəfə köçdü, hər dəfə Lerikə gəlib-gedə bilmədilər, üstəlik borclarını ala biləcəklərinə ümidləri də qalmadı, “onsuz da bunlarla vuruşmağın mənası yoxdur” fikirləşib, pullarından əl çəkdilər.

Fəhlələrin deməsinə görə, müxtəlif qurumlara yazdıqları məktubların cavabı onlara Lerik Rayon İcra Hakimiyyətindən gəlir. Bu cavablarsa eyni məzmunda olur: gələcəkdə işlər davam etdiriləndə fəhlələrə olan borc da ödəniləcək.

Məktəbin tikintisinə layihə-smeta sənədlərinin hazırlanması işləri üzrə satınalmanı “Arxproyekt” MMC udub. Lakin tikintinin satınalması ilə bağlı tender keçirilməsinə dair heç bir məlumat tapılmadı.

2015-ci ilin avqustunda Lerikdə keçirilən hesabat yığıncağında icra hakimiyyətinin şöbə müdiri Habil Məlikov bildirib ki, Boykəndildəki yeni tikilən məktəb binasında tamamlanma işləri görülür və məktəb binası yeni təhsil ilində istifadəyə veriləcək. Ötən ilin fevralında hesabat yığıncağında icra hakimiyyətinin başçısı bildirib ki, maliyyə vəsaiti ayrılmadığından Boykəndil məktəbinin tikintisi dayandırılıb.

Əmək Müfəttişliyi fəhlələrə deyib ki, şirkətin yerini özünüz tapın

Meydan TV müxbirinin Lerik Rayon İcra Hakimiyyətindən məsələyə münasibət öyrənmək cəhdi boşa çıxıb. Ancaq qurumun fəhlələrə yazdığı məktublarda qeyd olunur ki, Nazirlər Kabinetinin ayırdığı maliyyə vəsaiti hesabına rayon icra hakimiyyətinin sifarişi ilə podratçı təşkilat tərəfindən Boykəndil kənd orta məktəbinin tikintisi həyata keçirilsə də, işlər başa çatdırılmayıb. Qurumun heç bir məktubunda tikintini həyata keçirmiş şirkətin adı qeyd olunmayıb. Bildirilib ki, əmək haqlarının ödənilməməsi ilə bağlı narazı fəhlələr hüquq-mühafizə orqanlarına müraciət edə bilər.

Əmək Müfəttişliyinə göndərdiyi məktubda isə icra hakimiyyəti Boykəndil kəndində məktəb tikintisini “Tikinti Təchizat Dizayn” MMC tərəfindən həyata keçirildiyini göstərib. Əmək Müfəttişliyi fəhlələrə göndərdiyi məktubda qeyd edib ki, şirkətin yerləşdiyi ünvana – Bakı şəhəri, Nizami rayonu, Rüstəmov küçəsi ev 60, mənzil 26-ya bildiriş göndərilib. Ancaq şirkət həmin ünvanda fəaliyyət göstərmədiyindən bildiriş geri qayıdıb. Əmək Müfəttişliyi şirkətin həmin ünvanda yerləşməməsiylə bağlı akt tərtib edib. Müfəttişlik MMC-nin yerləşdiyi ünvanı tapmağı fəhlələrin öhdəsinə buraxıb.

"Pullar göyə sovrulub, bunu araşdıran yoxdur"

"Pullar göyə sovrulub, bunu araşdıran yoxdur"

Источник: Foto: Meydan TV

İki il ərzində 100 tenderin qalibi, 55 milyondan çox pul...

“Tikinti Təchizat Dizayn” MMC-nin yerləşdiyi ünvanı günlərlə soraqlayan Meydan TV müxbiri də öyrənə bilməyib. Şirkətlə bağlı internet üzərindən araşdırma apararkən isə ortalığa çıxıb ki, şirkət 2012-2014-cü illərdə fəaliyyət göstərib. Qısa müddətdə satınalmalarla bağlı 100 tenderin qalibi olub, sonra da “qeybə çəkilib”.

“Tikinti Təchizat Dizayn” MMC 2 il ərzində Bakı Metropoliteni, “Bakıelektrikşəbəkə” ASC (2015-ci ildən Azərişıq ASC adlanır), Melorasiya və Su Təsərrüfatı ASC, İçərişəhər Dövlət Tarix-Memarlıq Qoruğu İdarəsi, paytaxt və bölgələrdəki icra hakimiyyətləri, Milli Elmlər Akademiyası, Əmək və Əhalinin Sosial Müdafiəsi Nazirliyi, Təhsil Nazirliyi, Dövlət Sərhəd Xidməti, Ədliyyə Nazirliyi, Daxili İşlər Nazirliyi, Müdafiə Nazirliyi, Səhiyyə Nazirliyi və digər qurumların satınalmalar üzrə elan etdikləri ümumilikdə 100 tenderin qalibi olub. Bu tenderlərin 6-sı 2012-ci, 44-ü 2013-cü, 50-si 2014-cü ilin payına düşür.

2 il ərzində bu tenderlər üzrə dövlət büdcəsindən ayrılan ümumi məbləğ 55 067 327,19 manat təşkil edib.

Пока вы здесь ...

У нас есть небольшая к вам просьба. В среде, где информация находится под жестким государственным контролем, Мейдан ТВ усердно работает над тем, чтобы обеспечить доступ к качественной независимой журналистике. Мы проливаем свет на истории, которые вы иначе не прочитали бы, так как мы считаем, что те, кто не может высказаться, заслуживают быть услышанными, а те, кто находится у власти, должны быть привлечены к ответственности. Мы вкладываем в это значительное время, усилия и ресурсы, поэтому нам нужна ваша помощь.

Ваша поддержка дает возможность нашим смелым журналистам, многие из которых работают под большой угрозой своей личной свободе и безопасности, продолжать свою деятельность. Каждый вклад в защиту независимой журналистики в Азербайджане имеет значение. Спасибо.

ПОДДЕРЖИТЕ НАС
Bölmələr:  
Короткие линки:   http://mtv.re/7w4n8i

Самое читаемое