Ukrayna Prezidenti: “Rusiya Xersonda 400-dən çox hərbi cinayət törədib”
Ukrayna Prezidenti Volodimir Zelenski Xersona səfər edib.
Bu barədə “Reuters” hadisə şahidlərinə istinadən məlumat yayıb.
Ukrayna hökuməti isə dövlət başçısının işğaldan azad edilən şəhərə səfərini rəsmən açıqlamayıb.
Volodimir Zelenski Rusiya ordusunu Xersonun işğalı zamanı 400-dən çox hərbi cinayət törətməkdə ittiham edib.
Bu barədə “Euronews” məlumat yayıb.
“Müstəntiqlər artıq Rusiyanın 400-dən çox hərbi cinayətini sənədləşdirib. Həm mülki vətəndaşların, həm də əsgərlərin cəsədlərini aşkar ediblər. Biz hər qatili tapıb məsuliyyətə cəlb edəcəyik”, – Zelenski belə deyib.
Onun sözlərinə görə, geri çəkilən Rusiya qoşunları əsas infrastrukturu dağıdıb, nəticədə su, dərman və çörək çatışmazlığı ilə şəhərdə çətin humanitar vəziyyət yaranıb.
O, Xersonun enerji sisteminin mümkün qədər tez bərpa edilməsinə söz verib.
Bildirib ki, digər məsələlər vaxt aparacaq.
Xerson şəhəri 2022-ci il martın 3-dən noyabrın 11-dək Rusiyanın işğalı altında olub.
