Meydan TV-yə verilən məlumata görə, Vəfa Nağını, vəkili Seymur Abbası və jurnalist Şəhla Kərimi sərbəst buraxıblar.
Onları mülki geyimli polislər Bakının Əhmədli qəsəbəsinə gətiriblər.
Deputatlığa namizəd DSK önündə aksiya keçirirdi
70 saylı Neftçala seçki dairəsindən deputatlığa namizəd Vəfa Nağı və jurnalist Şəhla Kərimin saxlanıldığı bildirilir.
Baş vermiş seçki saxtakarlığına etiraz edən Vəfa Nağı DSK-nın önündə oturaq aksiya keçirirdi.
Onun DSK qarşısında çadır qurduğu bildirilib.
Daha sonra Neftçala Polis Şöbəsinin İdarəsi tərəfindən saxlanıldığı deyilir.
Neftçala Rayon Polis İdarəsi isə Vəfa Nağının yaxınlarına deyib ki, namizədi onlar saxlamayıblar.
Hazırda deputatlığa namizədin harada və hansı qurum tərəfindən saxlanıldığı bəlli deyil.
Qanunla parlamentin yeni tərkibi Konstutusiya Məhkəməsi tərəfindən təsdiqlənənə qədər deputatlığa namizədin toxunulmazlıq hüququ var.
Ona görə də yaxınları bu aktı qanunsuz hesab edirlər.
Daxili İşlər Nazirliyi bununla bağlı hər hansı açıqlama verməyib.
Daxili İşlər Nazirliyinin mətbuat xidmətinin regional qrupundan “Turan”a bildirilib ki, Neftçalada Şəhla Kərim adda jurnalist saxlanılmayıb.
Hakimiyyənyönlü media bir neçə gündür seçki ilə bağlı etirazları təxribat adlandırır, pozuntuların olmadığını, Vəfa Nağının xarici qüvvələrin təsiri altında hərəkət etdiyini yazır.
Həmin saxtakarlıq faktlarını işıqlandıran müstəqil media orqanları da tənqid hədəfindədir.
