“Ukrayna Rusiyanın təcavüzünə müqavimət göstərdiyi müddətdə gürcü xalqının yeni müharibədən qorxmasına ehtiyac yoxdur”
Ukrayna Xarici İşlər Nazirliyi “Gürcü Arzusu”nun seçkiqabağı bannerlərində müharibə görüntülərinin istifadəsini qınayıb.
“Ukrayna Xarici İşlər Nazirliyi Rusiyanın Ukraynaya qarşı apardığı amansız müharibənin dəhşətli nəticələrini, minlərlə günahsız insanın iztirablarını və qanını, kilsə ziyarətgahlarının dağıdılmasını və onların mədəni irsini əks etdirən görüntülərin siyasi reklamlarda istifadəsini pisləyir və qəbuledilməz hesab edir”, – Ukrayna XİN-in bəyanatında belə deyilir.
“Ukrayna Rusiyanın təcavüzünə müqavimət göstərdiyi müddətdə gürcü xalqının yeni müharibədən qorxmasına ehtiyac yoxdur. Bu müqavimətin dəhşətli qiyməti həm də Gürcüstanda sülhün qiymətidir”, – bəyanatda qeyd olunub.
Ukrayna Xarici İşlər Nazirliyi Gürcüstan hökumətini ölkədəki daxili siyasi mübarizədə Ukraynaya və onun vətəndaşlarına qarşı müharibə mövzusundan istifadə etməkdən çəkinməyə çağırır:
“Ukrayna Gürcüstanın beynəlxalq səviyyədə tanınmış sərhədləri daxilində suverenliyini və ərazi bütövlüyünü ardıcıl, ciddi və qətiyyətlə dəstəkləməyə davam edəcək. Ümid edirik ki, Gürcüstanda parlament seçkiləri dinc və demokratik şəraitdə keçəcək və gürcü xalqı Aİ və NATO-ya daxil olmaq istiqamətində strateji kursunu davam etdirəcək”.
Sentyabrın 26-da Tbilisidə “Gürcü Arzusu” Partiyasının üzərində “Müharibəyə yox! Sülhü seçin!” yazısı olan seçki bannerləri şəhərin müxtəlif yerlərində yerləşdirilib. Bəzi pankartlarda Ukraynanın Donetsk vilayətinin Boqorodiçne kəndində bombardman nəticəsində dağıdılan kilsə, sağ tərəfdə isə Tbilisi Trinity Katedralı təsvir olunub. Bannerlərin sol tərəfində ağ-qara, sağ tərəfində isə rəngli fotoşəkillər var. Digər plakatda solda dağıdılmış Mariupol teatrı, sağda isə “Gürcü Arzusu”nun fəxri sədri Bidzina İvanişvilinin təsis etdiyi “Kartu Fondu” tərəfindən bərpa edilən Senaki teatrı əks olunub. Müharibə zamanı dağıdılmış Ukrayna binalarının təsvir olunduğu pankartların sol tərəfində aşağıdakı müxalifət siyasi partiyalarının seçki nömrələrinin üstündən xətt çəkilib: 4 – “Gvaramia Melia Girchi dəyişiklik üçün koalisiya zamanıdır” 5 – “Birlik-Milli Hərəkat” 9 – “Güclü Gürcüstan – səy, xalq üçün, azadlıq üçün!” 25 – “Gürcüstan üçün sevinc”.
“Azadlıq” radiosuna “Gürcü Arzusu” Partiyasının ictimaiyyətlə əlaqələr xidmətindən deyilib:
“Təbii ki, bu, “Gürcü Arzusu”nun kampaniyasıdır və hakim partiyanın sifarişi ilə hazırlanıb və yerləşdirilib”.
Onların izahına görə, bu, ictimaiyyətə “müxalifətin ölkəni hara aparacağını” xatırlatmağa xidmət edir. Gürcüstan Prezidenti Salome Zurabişvili öz “Facebook” səhifəsində yazıb ki, “o, mədəniyyətimizə, adət-ənənələrimizə, tariximizə və inancımıza bu qədər biabırçı, bu qədər təhqiramiz bir şey görməyib.
“Nə günə düşmüsən, DTK-da hazırlanmış plakatı boş yerə və lütfsüz öz xalqına təqdim etmək necə də acınacaqlıdır! … “ləyaqətlə” cəhənnəmə!”
