Penitensiar Xidmət Meydan TV-nin Taleh Bağırzadə ilə bağlı sorğusuna cavab verib.
Xidmətdən bildirilib ki, 12 saylı Cəzaçəkmə Müəssisəsində məhkumların mənəvi və fiziki təzyiqlərə, işgəncələrə və ya qeyri-insani rəftara məruz qalması, onların hüquqlarının pozulması halları qeydə alınmayıb:
“Su problemi ilə bağlı da xidmətin baş idarəsinə heç bir şikayət daxil olmayıb”.
“Mayın 8-də 12 saylı cəzaçəkmə müəssisəsinin yerləşdiyi inzibati ərazidə su təchizatında fasilələr yaranmış, müəssisə ərazisində müxtəlif yerlərdə quraşdırılmış 200 tonluq çənlərdəki su ilə məhkumların içməli, həm də məişət ehtiyacları üçün suya tələbatı təmin edilib“, – deyə Penitensiar Xidmət əlavə edib.
12 saylı cəzaçəkmə müəssisəsində həbsdə olan Müsəlman Birliyi Hərəkatının sədri Taleh Bağırzadə ölümlə təhdid olunduğunu deyir. İlahiyyatçı həmçinin bir neçə inanclı şəxsin də həbsxanada işgəncəyə məruz qaldığını bildirib.
Hər şey mayın 8-də cəzaçəkmə müəssisəsində suyun olmamağına etiraz etməklə başlayıb.
Taleh Bağırzadə şikayətini rəhbərliyə bildirərkən onu qapıda gözləyən 4 nəfər inanclı şəxs karsa salınaraq, işgəncə görüb. İşgəncə nəticəsində burnu zədələnən Rasim Məsiyev cəzaçəkmə müəssisəsinin tibb məntəqəsinə yerləşdirilib.
Taleh Bağırzadənin həyat yoldaşı Leyla İsmayılzadə deyir ki, ilahiyyatçı daha öncə də ölüm təhdidləri alıb. Onu həbsxanada təcrid vəziyyətində saxlamaq istəyirlər.
Məsələ ilə bağlı Penitensiar Xidmətə suallarımızı ünvanlasaq da, cavab almaq mümkün olmayıb.
Müsəlman Birliyi Hərəkatı məsələ ilə bağlı hüquq-mühafizə orqanlarına müraciət edib.
Nardaran hadisələri zamanı həbs olunan Taleh Bağırzadə 9 ildir həbsdədir. Dövlət çevrilişinə cəhd, silah-sursat saxlama, qəsdən adam öldürmə kimi maddələrlə suçlanan ilahiyyatçı 20 il azadlıqdan məhrum edilib.
Taleh Bağırzadə ittihamları qəbul etmir, siyasi göstəriş əsasında həbs olunduğunu bildirir.
