Son bir ildə dünyada 129 jurnalist və media nümayəndəsi peşə fəaliyyəti zamanı həyatını itirib.
Jurnalistlərin Müdafiə Komitəsinin (CPJ) illik hesabatına görə, artıq ikinci ildir ki, jurnalist qətllərinin sayı rekord həddə çatır.
Öldürülənlərdən ən azı 104-ü münaqişə zonasındakı fəaliyyətlərilə əlaqədar həyatını itirib, təşkilat bildirir ki, bu ölümlərin təxminən üçdə ikisinə görə məsuliyyət İsrailin üzərinə düşür.
Doqquz jurnalist Sudanda, altı jurnalist Meksikada, dörd jurnalist Ukraynada Rusiya qüvvələrinin hücumları nəticəsində, üç jurnalist isə Filippində öldürülüb.
CPJ qeyd edir ki, 2025-ci ildə əsasən Qəzzada fəaliyyət göstərən 86 fələstinli jurnalist İsrail atəşi nəticəsində həlak olub, Yəməndə husi media mərkəzinə edilən hücum zamanı isə 31 media işçisi həyatını itirib. Təşkilat bunu indiyədək qeydə alınmış ikinci ən ölümcül hücum adlandırır. İsrail ötən ilin sentyabrında Yəməndə media mərkəzinə hücum etdiyini etiraf edib və onu husi təbliğat bölməsi kimi təqdim edib.
Hesabata görə, İsrail həmçinin CPJ-nin qəsdən hücumlar və “qəsdən qətllər” kimi təsnif etdiyi 47 qətlin 81 faizinə görə məsuliyyət daşıyır. CPJ xəbərdarlıq edib ki, Qəzzada giriş məhdudiyyətləri və yoxlama çətinlikləri səbəbindən faktiki rəqəm daha yüksək ola bilər.
İsrail ordusu şərh tələbinə cavab verməyib. Əvvəllər Qəzzadakı qüvvələrinin yalnız döyüşçüləri hədəf aldığını, döyüş ərazisində fəaliyyət göstərən jurnalistlərin isə müəyyən risklərlə üzləşdiyini bildirmişdilər. CPJ vurğulayıb ki, İsrail xarici jurnalistlərin Qəzzaya girişinə icazə vermir, buna görə də orada öldürülən bütün media işçiləri fələstinlilərdir. Hesabatda qeyd olunur ki, bəzi hallarda İsrail jurnalistlərin HƏMAS ilə əlaqəli olduğunu iddia edib, lakin beynəlxalq xəbər təşkilatları öldürülənlərin silahlılarla əlaqəsi olmadığını təsdiqləyib. CPJ bu iddiaları “ölüm böhtanı” kimi qiymətləndirib.
