Natiq Cəfərli: “Nə baş verib ki, otellər 30 faiz bahalaşıb?”
2024-cü ilin ilk 3 ayında Azərbaycanda otellərdə keçirilmiş gecələrin sayı 779,4 min olub.
Dövlət Statistika Komitəsi (DSK) bildirir ki, bu, 2023-cü illin eyni dövrü ilə müqayisədə 41,9 faiz çoxdur.
Ən çox gecələmə paytaxt Bakıda olub. İkinci yerdə Qusar, ondan sonra Naftalan gəlir.
Həmçinin ilin yanvar-avqust aylarında Azərbaycandakı 3 ulduzlu otellərdə bir gecə qalmaq üçün orta qiymət 82,7 manat olub. Bu da ötən ilin eyni dövrü ilə müqayisədə 26,4 faiz çoxdur. 4 ulduzlu hotellərdə bir gecə qalmaq üçün orta qiymət 118,2 manat olub, bu ötən ilin eyni dövrü ilə müqayisədə 21,3%, 5 ulduzlu hotellərdə bir gecə qalmaq üçün orta qiymət 226,8 manat təşkil edib, bu ötən ilin eyni dövrü ilə müqayisədə 39,1 % bahalaşma deməkdir.
İqtisadçı Natiq Cəfərli deyir ki, ölkə ərazisində 3-4-5 ulduzlu otellər 1 ildə, ortalama 30 faiz bahalaşıb:
“Hökumət deyir ki, qiymət artımı dayanıb, inflyasiya azalıb, turizm sahəsində çalışanların maaşları artmayıb. Yaxşı, nə baş verib ki, otellər 30 faiz bahalaşıb?”.
![Natiq Cəfərli](https://d9mc3ts4czbpr.cloudfront.net/wp-content/uploads/image_from_ios_178-scaled-e1648798569981-1200x696.jpg)
İqtisadçı bildirir ki, qiymətlərin kəskin artmasına baxmayaraq, rəsmi açıqlamaya görə, otellərin doluluq səviyyəsi aşağıdır:
“Bu ilin ilk rübündə Azərbaycan üzrə bütün otellərdə nömrələrin 82%-i boş qalıb. Doluluq səviyyəsi ölkə üzrə cəmi 18% olub. Əgər bu rəqəmlər doğrudursa, o zaman məmləkətdə məntiq yenə “ölüb”. Otellərə gələn yoxdur, amma onlar qiyməti, ortalama 30% qaldırıblar, məntiqlə tam tərsinə olmalıdır, qiymətləri salmalıdırlar ki, adamlar daha çox gəlsinlər”.
Natiq Cəfərli deyir ki, əgər rəsmi rəqəmlər yanlışdırsa, otellər vətəndaşları qonaqlayır, amma rəsmiləşdirmirlərsə, o zaman nəzarətçi hökumət qurumları hara baxır:
“Niyə göz yumurlar, nəyin müqabilində görməzdən gəlirlər?”.