Hərbi prokurorluq da deyib ki, Atambayev bu iddialarla bağlı rəsmi şikayət edib
Qırğızıstan hakimiyyəti keçmiş prezident Almazbek Atambayevin Dövlət Milli Təhlükəsizlik Komitəsinin (UKMK) onun ofisini gizli dinlədiyi ilə bağlı iddiaları üzərində yeni istintaq başladıb, – Azadlıq Radiosu xəbər verir.
Hərbi prokurorluq mayın 30-da deyib ki, Atambayev 27 may tarixində bu iddialarla bağlı rəsmi şikayət edib. Təsdiqini taparsa, iddialar gizlilik, şəxsi yazışma və vəzifə səlahiyyətlərindən sui-istifadə haqqında qanunların pozulması demək olacaq.
Atambayevlə əlaqəli mətbuat orqanı olan “Aprel” telekanalı mayın 23-də UKMK əməkdaşlarının Atambayevin və prezident administrasiyasının keçmiş başçısı Fərid Niyazovun ofisində səs sistemlərinin quraşdırıldığını iddia edən video yayımlayıb.
UKMK bu iddiaları rədd edib.
Televiziya proqramı keçmiş dövlət başçılarının təqibinə imkan verən qanunvericilik qüvvəyə mindikdən dörd gün sonra yayınlanıb.
Qanunvericilik mayın ortalarında hazırkı Prezident Sooronbay Jeenbekov tərəfindən təsdiq edilib. Qanun bir sıra siyasətçilərin vəzifədə olduğu zaman sələfi tərəfindən verilmiş qərarlarla bağlı istintaq aparmağa icazə verir.
Konstitusiya ilə hakimiyyət müddəti məhdudlaşdırılmış Atambayev keçmiş Baş nazir Jeenbekovu 2017-ci ilin oktyabr ayında keçirilmiş prezident seçkilərində öz namizəd kimi təqdim etmişdi.
Lakin ikili münaqişə yaşadıqdan sonra bir ildən artıqdır ki, bir-birlərini ictimai tənqid edir. İndiyədək Atambayevin bir neçə əməkdaşı korrupsiya ittihamı ilə həbs edilib.
