“Hromadske”nin materialı
Oktyabrın 24-dən Kiyevdə elektrik enerjisini müvəqqəti kəsməyə başlayıblar. Rusiyanın zərbələrindən zərər çəkmiş şəhərin elektrik şəbəkəsində mümkün qəzaların qarşısını almaq üçün bir çox evdə səhər və axşam dörd saata yaxın işıqlar söndürülür.
Oktyabrın 25-də “Ukrenerqo” artıq saatlarla işığın kəsilməyəcəyini bildirsə də, şəhərin bəzi yerləri hələ də qaranlığa qərq olub. Bu da paytaxtın mərkəzini və strateji obyektləri gizlətmək üçün edilir. Buna baxmayaraq, insanlar küçələrdə gəzir, istirahət edirlər.
Ukraynanın Baş prokuroru Andrey Kostin bildirib ki, müharibə başlayandan rusiyalı hərbçilər 85 dəfə Ukraynanın elektrik enerjisi obyektlərini atəşə tutub, onlardan 51 dəfə təkcə oktyabr ayında. Daha çox Dnepropetrovsk vilayəti (8 dəfə), Lvov (6 dəfə), Vinnitsa (5 dəfə), Suma, Xarkov və Kiyev (hərəsi 4 dəfə) atəşə tutulub.
Buna görə də işıqların kəsilməsi cəbhə xəttinə daha yaxın olan, xüsusən də elektrik ötürücü xətlərinin sıradan çıxarıldığı yaşayış məntəqələrinin sakinləri üçün adi hala çevrilib.
“Ukrenerqo” dispetçerləri görəndə ki, müəyyən regionda istehlak artır və yaxın zamanlarda Rusiya tərəfindən dəyən ziyana görə daha çox elektrik enerjisi çatdırmaq mümkün olmayacaq, işığın müvəqqəti kəsilməsi barədə qərar verirlər.
Müvəqqəti blackout şəbəkənin yükünü azaltmaq və elektrik şəbəkələri zərbələrdən ziyan görəndən sonra təkrar qəzalardan sığortalanmaq üçün lazımdır.
