Astaranın Pensər kəndi

Mənbə: Foto: Meydan TV

Başlıq: Astaranın Pensər kəndi

Pensərlilər: Gərək uşaq evdən çıxanda yol tapsın ki, məktəbə də getsin...

Məqalə yeniləndi:  25 Fevral 2020

Astaranın bu kəndində illərdir ki, həllini tapmayan yol problemi var

“Yağış yağanda kənd içində əl-ayaq çəkilir, heç kim evdən çölə çxmır. Çünki küçə ilə getmək, yolu keçmək mümkün deyil. Hər yeri su basır, bu yaxınlarda məktəbə gedən uşaq su ilə dolu çuxura düşdü, həyatını zorla xilas etdik. Uşaqları məktəbə göndərə bilmirik. Sonra da deyilər, kənd yerlərində məktəbə davamiyyət niyə aşağıdır. Gərək uşaq yol tapa ki, məktəbə gedə...”

“Kəndimizə təcili yardım, qonaq-qara gəlmir”

Astaranın Pensər kəndində xeyli sosial problem var. Ancaq hazırda bu problemlərdən ən vacibi kəndiçi yollarla bağlıdır. Kənd sakinləri danışır ki, yağış yolları palçıqlı və keçilməz etdiyindən böyüklər işə, balacalar məktəbə gedə bilmir:

“Sovet vaxtı heç olmasa vaxtaşırı gətirib bu yollara daş-çınqıl tökərdilər, indi kənd lap baxımsız qalıb. Bir kəndin vəziyyətini bilmək istəsən, eləcə yollarına bax, sənə hər şey aydın olar. Bizim də kəndin vəziyyəti yollarından bəlli... Uşaqları məktəbə yollaya bilmirik. Hamısı dizəcən palçığa batır. Bu tərəflərə təcili yardım maşını gəlmir, qışboyu qonaq-qara olmur, yağış yağanda evlərimizdən başımızı çölə çıxara bilmirik, çünki palçıqdan ayaq basmağa yer tapmırıq”.

“Uşaqları boynumuzda daşıyırıq”

“Dəfələrlə özümüz pul toplayıb çınqıl alıb tökmüşük. Kənd də kasıb kənddir, adamlarda çörək almağa pul yoxdur. Bunu tez-tez eləmək olmur. Bu problem dövlət səviyyəsində yerli-dibli həll olunmalıdır”, - kənd sakinləri deyir.

“Yayda uşaqlar bağçaya gedə bilmir, yolun bütün tozu uşaqların ciyərlərinə hopur, maşın keçəndə təkərlərin qopardığı toz dumanının içində uşaqlar itib-batırlar. Qışda da topuğa qədər palçıq, su ilə dolu çuxurlar yeriməyə çətinlik yaradır. Bir də görürsən bir ata uşağın birini boynunda oturdub, o birini qucağında tutub, ya kürəyinə şəlləyib, palçıqdan keçirib bağçaya, ya məktəbə aparır. Yollar təmir olunmadıqca palçıq, çıxırlar ilbəil daha da artır, dərinləşir”, - kənd sakinləri danışır.

“Məktəbin binası qəzalıdır”

Daha bir problem kənddəki 1 saylı orta məktəbin durumuyla bağlıdır. Sakinlər deyir, təmirsiz məktəb övladlarının həyatı üçün təhlükə mənbəyinə çevrilib:

“Sovet vaxtı tikilmiş məktəb bircə dəfə də olsun əsaslı təmir edilməyib. Tavanı, döşəməsi köhnədir, sinif otaqları rütubətlidir, nəmişlik uşaqların daxili orqanlarını sıradan çıxarır. Bina qəzalı vəziyyətdədir, soyuqdur, uşaqları məktəbə göndəririk, saatlarla soyuq siniflərdə oturduqlarından tez-tez soyuqlayıb xəstələnirlər”.

Pensər kəndi

Pensər kəndi

Mənbə: Meydan TV

Kənddə enerji transformatoru da istifadəyə yararsızdır. Sakinlərin deməsinə görə, nəticədə kənd tez-tez işıqsız qalır. Kənddəki yeni yaşayış massivində isə qaz xətti yoxdur.

Onlar illərdir sadalanan problemlərin həlli üçün aidiyyəti qurumlara müraciət etdiklərini deyirlər.

“İcra başçısı kənd sakinlərini dinləyib”

Astara Rayon İcra Hakimiyyətindən Meydan TV-yə bildirilib ki, kəndin problemləri onların diqqətindədir. Ötən ilin oktyabrında icra başçısı Pensərdə olub və əhaliylə görüşüb:

“Sakinlər başçıdan kənddəki elektrik transformatorunun yenisi ilə əvəz olunmasını, kənddə mədəniyyət evinin tikilməsini, sahilbərkitmə işlərinin davam etdirilməsini, Pensər-Çayoba yolunun, Pensər kənd 1 saylı tam orta məktəbin təmir edilməsini, kənddə yeni salınmış yaşayış massivinin qazlaşdırılmasını, məişət tullantılarının kənddən daşınması üçün tədbir görülməsini, kəndə içməli su xəttinin çəkilməsini istəybilər. Qurum problemlərin araşdırılması və həll olunması üçün aidiyyəti qurumlara rəsmi məktubla müraciət edib.

Pensərin 5 min nəfərə yaxın əhalisi var. Əhali əsasən meyvəçiliklə məşğul olur. Kəndiçi yolların bərbadlığı onların kənd təsərrüfatıyla məşğuliyyətini də əngəlləyir.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Məqalə yeniləndi:  25 Fevral 2020
Bölmələr:  
qısa linklər:   http://mtv.re/02irbx

Ən çox baxılan