“Kontingentin mandatını uzatmaqla bağlı qərar sülh sazişinin imzalanmasından, sərhədlərin delimitasiyasından asılıdır”
Ermənistanın Baş naziri Nikol Paşinyan Qarabağdakı Rusiya sülhməramlılarının missiyasını uzatmağı təkif edib.
Bu, oktyabrın 31-də Soçidə keçirilən üçtərəfli görüşdə təklif edilib. Noyabrın 2-də Ermənistan parlamentindəki 2023-cü ilin büdcə müzakirələrində Baş nazir Nikol Paşinyan bu barədə yenidən danışıb.
“Azatutyun” yazır ki, Baş nazir sülhməramlıların missiyasını 20, 15, 5 il müddətinə uzatmağı təklif etdiyini açıqlayıb.
Paşinyanın sözlərinə görə, bu təklif qəbul olunmayıb:
“Məncə, məsələ gündəliyə salınıb”.
Baş nazir həmçinin qeyd edib ki, kontingentin mandatını uzatmaqla bağlı qərar digər məsələlərdən – sülh sazişinin imzalanmasından, sərhədlərin delimitasiyasından asılıdır:
“Bu məsələlər həllini tapsa, onda sülhməramlılar məsələsi də başqa cür həllini tapacaq. Ancaq olmasa, yaxud müəyyən həcmdə həll edilsə, sülhməramlı kontingentimizin taleyi də bundan asılı olacaq”.
Nikol Paşinyan oktyabrın 31-də Rusiya Prezidenti Vladimir Putin, Azərbaycan Prezidenti İlham Əliyevlə Soçi görüşünün yekunlarına dair birgə bəyanata imza atıb. Bəyanatda tərəflər Azərbaycan-Ermənistan münasibətlərinin hərtərəfli normallaşmasına, Cənubi Qafqazda sülhə, sabitliyə, təhlükəsizliyə sadiqliklərini bildiriblər. Tərəflər güc tətbiqindən və ya onun tətbiqi ilə hədələməkdən çəkinməyə razılaşıblar.
