O, anasına görə aclığı dayandırmağa razılaşıb
Azərbaycan Xalq Cəbhəsi Partiyasının (AXCP) üzvü, eyni zamanda, partiya sədri Əli Kərimlinin ictimai əsaslarla mühafizəçisi olmuş Niyaməddin Əhmədovun martın 30-da aclıq aksiyasını dayandırdığı bildirilir. Onun bir aydan çoxdur ki, aclıq etdiyi bildirilirdi.
AXCP-dən verilən məlumata görə, o, anasına görə aclığı dayandırmağa razılaşıb.
AXCP fəalının anası Hürü Əhmədovanın da oğlu ilə bərabər aclıq etmək qərarı verdiyi deyilir.
“Deyib ki, övladıyla bərabər sonadək aclığı davam etdirəcək. Niyaməddin Əhmədov anasının bu qərarından xəbər tutandan sonra martın 30-da aclığı dayandırıb”– partiyadan bildirilib.
Niyaməddin Əhmədovun saxlandığı 7 saylı Cəzaçəkmə Müəssisəsində ona qarşı rəftara, cəza rejiminin ağırlaşdırılmasına, 1 illik həbsxana rejiminə köçürülməsinə və karserə salınmasına etiraz olaraq fevralın sonundan aclıq elan etdiyini partiya sədri Əli Kərimli özünün “Facebook” hesabında yaymışdı.
Niyaməddin Əhmədov 2020-ci ilin aprelindən həbsdədir. Öncə karantin rejimi qaydalarını pozma ittihamıyla ona 1 ay inzibati həbs cəzası verilib. Mayın 15-də inzibati həbsdən buraxılmalı olduğu gün isə barəsində cinayət işi başlanıb.
AXCP üzvünə qarşı ittihamda iddia olunur ki, Qabil Məmmədov siyasi mühacir kimi yaşadığı Almaniyadan terror məqsədilə Bakıya pul göndərib. Özü də sosial şəbəkələrdən terrora çağırışlar edib. Niyaməddin Əhmədova da pul göndərib ki, bu prosesdə iştirak etsin.
Niyaməddin Əhmədov Cinayət Məcəlləsinin 214-1 (terrorçuluğu maliyyələşdirmə), 28.281 (dövlət əleyhinə yönəlik açıq çağırışlara hazırlıq) və 233-1 (qanunla mülki dövriyyədə olmasına yol verilməyən əşyaları əldə etmə, saxlama) maddələrilə 13 il azadlıqdan məhrum edilib.
AXCP fəalı özünü təqsirli bilmir, Əli Kərimlinin mühafizəçisi olduğuna, 2019-cu ilin 19 oktyabrında Milli Şuranın keçirdiyi icazəsiz etiraz aksiyasında sona qədər onu tək buraxmadığına görə cəzalandırıldığını deyir.
Niyaməddin Əhmədov deyib ki, AXCP və Əli Kərimlinin əleyhinə ifadə verməsi üçün ağlasığmaz işgəncələrə məruz qalıb.
2021-ci il oktyabrın 8-də Bakı Ağır Cinayətlər Məhkəməsi Niyaməddin Əhmədovu 13 il azadlıqdan məhrum edib.
