“Putin bizim tərəfimizdən devriləcək və məhv ediləcək!”
Aleksandr Duqinin qızı Darianın qətlini “Milli Respublika Ordusu” öz üzərinə götürüb.
Bu barədə 2016-cı ildə Ukraynada yaşayan keçmiş rusiyalı deputat İlya Ponomarev «Утро Февраля» nəşrinə “Milli Respublika Ordusu”nun bəyanatını oxuyarkən deyib.
“Biz, rusiyalı fəallar, hərbçilər və siyasətçilər, indi Milli Respublika Ordusunun partizanları və döyüşçüləri, Rusiya xalqlarının müharibə qızışdırıcılarını, soyğunçularını və zülmkarlarını qanundan kənar hesab edirik! Biz prezident Putini hakimiyyəti qəsb edən və Konstitusiyaya düzəlişlər edən, slavyan xalqları arasında qardaş qırğınına səbəb olan və rus əsgərlərini qəti və mənasız ölümə göndərən hərbi cinayətkar elan edirik”,-deyə bəyanatda vurğulanır.
Bəyanatda qeyd olunub ki, hüquqlarından məhrum edilmiş insanların tiranlara qarşı üsyan etmək hüququ var:
“Putin bizim tərəfimizdən devriləcək və məhv ediləcək! Məqsədimiz Rusiyanın və onun qonşularının məhvini dayandırmaq, xalqımızın sərvətini talamış, bu gün ölkə daxilində və xaricində cinayətlər törədən bir ovuc Kreml iş adamlarının fəaliyyətini dayandırmaqdır. Biz Rusiya hökumətinin və vilayət administrasiyalarının məmurlarını qəsbkarın ortaqları elan edirik – səlahiyyətlərini tərk etməyənlər məhv ediləcək”.
“Milli Respublika Ordusu” Putinin hakimiyyətə gələn zaman Rusiyada evlərin partladılmasını xatırlayaraq əlavə edib ki, mövcud rejim ən ağır cinayətlərin heç birində dayanmayacaq:
“Bəyan edirik ki, ancaq bu gücə malik olan şəxslərə qarşı tədbirlər həyata keçiririk. Mülki obyektlərə, mülki şəxslərə hücum etməyəcəyik. Əgər Putinin təhlükəsizlik qüvvələri belə təxribatlar törədəcək və qurbanları bizə aid edəcəksə, inanmayın! Rusiya ordusunun əsgərlərini başqa ölkələrdən – Gürcüstandan, Suriyadan və digər ölkələrdən olan qardaşlarımıza atəş açmağı dayandırmağa çağırırıq”.
“Bütün rusları sıralarımıza qoşulmağa və Putin hakimiyyətinin rüsvay etdiyi üçrəngli bayrağın əvəzinə yeni Rusiyanın ağ-göy-ağ bayrağını qaldırmağa çağırırıq. Mübarizəyə hazır olanları bizdən nümunə götürməyə və bu qeyri-insani, ikiüzlü, xalqa qarşı olan rejimi devirməyə çağırırıq! Nə milliyyəti, nə də vətəni olmayan, yalnız pulu və hakimiyyəti sevənlərin müharibə cinayətləri törətdiyinə görə rusların bütün dünyada böhtan atmağa başlamasını qəbuledilməz hesab edirik. Dünya Rusiyanın düşməni deyil, Rusiya da bəşəriyyətin düşməni deyil və biz bunu əməlimizlə sübut edəcəyik. Qələbəmizdən sonra biz Putin hakimiyyəti tərəfindən qanunsuz olaraq məhkum olunmuşların hamısını dərhal azad edəcəyik. Biz Rusiyada yaşayan bütün xalqlara azadlıq verəcəyik və yeni cəmiyyət quracağıq – oliqarxsız, korrupsiyasız, məmur özbaşınalığı olmayan, yoxsulluğu alçaltmayan cəmiyyət”, – deyə bəyanat bu fikirlərlə yekunlaşır.
Bəyanatı oxuyan İlya Ponomarev Rusiya Dövlət Dumasını V və VI çağırışda “Ədalətli Rusiya” fraksiyasını təmsil edib. O, 2014-cü ildə Dumada Krımın Rusiyaya birləşməsinin əleyhinə səs verən yeganə deputat olub və elə həmin il də ABŞ-a gedib.
1 il sonra ölkə prokurorluğu onun deputat toxunamazlığını ləğv edib və haqqında cinayət işi açaraq axtarış elan edib.
2016-cı ildə isə Duma 30 iclasda iştirak etmədiyi üçün İlya Ponomarevi deputat səlahiyyətlərindən məhrum edib.
Keçmiş deputat 2019-cu ildən Ukrayna vətəndaşıdır.
Avqustun 20-də rusiyalı politoloq Aleksandr Duqinin qızı Daria Duqina avtomobilinin partlaması zamanı həlak olub.
Hadisənin Daria Duqinanın “Tradition” festivalından qayıdarkən baş verdiyi bildirilir.
