Azərbaycan 2025-ci il Korrupsiyanı Qavrama İndeksində 30 bal toplayaraq 182 ölkə arasında 130-cu yerdə qərarlaşıb. Bu göstərici, korrupsiyaya qarşı beynəlxalq qeyri-hökumət təşkilatı “Transparency International”ın fevralın 10-da yayılan illik hesabatında yer alıb. Qeyd edilir ki, Azərbaycan 2024-cü ildə 22 balla 154-cü olmuşdu ki, bu da 2025-ci ildə müəyyən yaxşılaşma olsa da, dövlət sektorunda korrupsiyanın hələ də geniş yayıldığını göstərir.
Hesabatda dünyada korrupsiyanın ümumi səviyyəsinin pisləşdiyi vurğulanır. Xüsusilə, idarəçilikdə boşluqların artması nəticəsində hətta oturuşmuş demokratiyalarda belə korrupsiya səviyyəsinin yüksəldiyi bildirilir. 182 ölkə və ərazidə dövlət sektorunda korrupsiyanın 0-dan 100-ə qədər qiymətləndirildiyi Korrupsiyanı Qavrama İndeksində 0 bal yüksək korrupsiyanı, 100 bal isə korrupsiyanın yoxluğunu ifadə edir. Bu il qlobal orta göstərici 42-yə enib ki, bu da 10 ildən artıq müddətdə ilk belə azalma sayılır. 182 ölkədən 122-nin balı 50-dən aşağıdır, yəni korrupsiya səviyyəsi yüksəkdir.
Hesabatda ABŞ (64), Kanada (75), Yeni Zelandiya (81), Böyük Britaniya (70), Fransa (66) və İsveç (80) kimi demokratiyalarda da korrupsiya göstəricilərinin gerilədiyi bildirilir. Qonşu ölkələrlə müqayisədə isə Gürcüstan 50 balla 56-cı, Ermənistan 46 balla 65-ci, Rusiya 22 balla 157-ci, İran isə 23 balla 153-cü yerdə qərarlaşıb.
“Transparency International” hesabatında Venesuela (10 bal) və Azərbaycan (30 bal) kimi tam avtokratiyalarda korrupsiyanın sistematik olduğu və hər səviyyədə mövcudluğu xüsusi vurğulanır.
Hesabatda həmçinin “Transparency International” qlobal səviyyədə korrupsiyaya qarşı mübarizədə cəsarətli liderliyin yoxluğunun beynəlxalq antikorrupsiya səylərini zəiflədiyini və bir sıra ölkələrdə islahatlar üçün təzyiqi azaldığını vurğulayır.
Ümumilikdə, hesabat korrupsiyanın dünya üzrə artan tendensiyasını və bunun demokratik idarəetmə, iqtisadi inkişaf və insan haqları üçün təhlükə yaratdığını xəbər verir. Azərbaycanın vəziyyəti bəzi göstəricilər üzrə yaxşılaşsa da, korrupsiyanın geniş yayıldığı ölkələr sırasında qalır və bundan ciddi narahatlıq ifadə olunur.
