Vəkil bu qərardan şikayət edəcəklərini deyir
Azərbaycan Demokratiya və Rifah Partiyasının (ADR) sədri, iqtisadçı Qubad İbadoğlu iyulun 23-də həbs olunandan bu günə qədər ailə üzvlərilə görüşə bilməyib.
Vəkili Fəxrəddin Mehdiyevin Meydan TV-yə bildirdiyinə görə, istintaq orqanının qərarıyla onun yaxınlarıyla görüşmək hüququ məhdudlaşdırılıb.
Vəkil deyir ki, istintaqın bu qərarından şikayət vermək niyyətindədirlər:
“Çünki bu qərarı əsassız hesab edirik, onu hüquqi müstəvidə mübahisələndirmək fikrindəyik. Həbsdə saxlanılan şəxsin ailə üzvlərilə görüşmək hüququ var və bu hüquq təmin olunmalıdır. Yaxınlarıyla telefonla danışa bilir. Amma övladlarıyla danışa bilmir…”.
Qubad İbadoğlunun övladları Azərbaycanda yaşamır.
Avqustun 9-da Kürdəxanıdakı Bakı İstintaq Təcridxanasında Qubad İbadoğlu ilə görüşdüyünü deyən vəkil müvəkkilinin sağlıq durumundan da danışıb.
Onun ürək xəstəliyilə yanaşı, həm də təzyiq və şəkər problemlərindən əziyyət çəkdiyini yada salan müdafiəçinin sözlərinə görə, qan təzyiqi sabit deyil, qanda şəkərin miqdarı da yüksəkdir. Hətta təcridxanada onun durumunu nəzərə alaraq, təzyiqini nəzarətdə saxlamaq məqsədilə mütəmadi ölçə bilməsi üçün aparat da veriblər.
“Havaların çox isti keçməsi, kamerada havalandırmanın olmaması səhhətinə mənfi təsir göstərir”, – Fəxrəddin Mehdiyev vurğulayıb.
Vəkil əlavə edib ki, Ombudsman Aparatının əməkdaşları da Bakı İstintaq Təcridxanasında Qubad İbadoğlu ilə görüşüblər.
Qubad İbadoğlunun qardaşı Qalib Bayramov bundan öncə iki dəfə açıqlama yayaraq, onun səhhətinin kəskin pisləşdiyini bildirib. Lakin deyilənlərə rəsmi qurumlar, o cümlədən Ədliyyə Nazirliyinin Tibb Baş İdarəsi və Penitensiar Xidmət münasibət bildirməyib.
Qubad İbadoğlu iyulun 23-də saxlanılıb, ertəsi gün Nərimanov Rayon Məhkəməsində onun barəsində ilkin istintaq dövrü üçün 3 ay 26 günlük həbs qətimkan tədbiri seçilib.
Ona qarşı Cinayət Məcəlləsinin 204.3.1 ( saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.
ADR sədri daha dörd nəfərlə əlbirlikdə ittiham olunur.
Onların adları ilk dəfə iyulun 23-də Türkiyə mediasında açıqlanmışdı.
FETÖ (Fətullah Gülən Terror Örgütü) ilə əlaqəli şəxslər kimi təqdim olunan bu dörd nəfərə qarşı da Qubad İbadoğlu ilə eyni – Cinayət Məcəlləsinin 204.3.1 maddəsi ilə ittiham irəli sürülüb.
Sözügedən dörd nəfər Döyrüş Cəfərov, Gümrah Əbdürəhmanov, Ruslan Əliyev və Anar Əliyevdir.
Qubad İbadoğlu saxlandıqdan sonra yayılan məlumatlarda iddia olunurdu ki, Anar Əliyev ifadəsində onun adını çəkib. Amma Qubad İbadoğlu ümumiyyətlə, bu şəxsi tanımadığını deyib.
Qubad İbadoğlu saxta pul ittihamını rədd edir, siyasi sifarişlə həbs olunduğunu bildirir.
Beynəlxalq təşkilatlar və ABŞ-ın bir neçə konqresmeni onun dərhal azadlığa buraxılmasını tələb edib.
