Onun hazırda reanimasiyada olduğu açıqlanıb
Sentyabrın 26-da İrkutsk vilayətinin Ust-İlimsk hərbi komissarı Aleksandr Yeliseyevin güllələndiyi deyilir.
Bu barədə Rusiya mediası məlumat yayıb.
“Bu gün Ust-İlimskdə 25 yaşlı Ruslan Zinin hərbi komissar Aleksandr Yeliseyeva 6 dəfə atəş açıb. Hərbi komissar Yeliseyev reanimasiyadadır, onun vəziyyəti ağır qiymətləndirilir”, – deyə məlumatda bildirilir.
İrkutsk vilayəti üzrə İstintaq Komitəsinin mətbuat xidmətinin məlumatına görə, Ust-İlimskdə saxlanılan Ruslan Zinin barəsində cinayət işi başlanıb:
“Rusiya Cinayət Məcəlləsinin 317 (Hüquq-mühafizə orqanı əməkdaşının həyatına qəsd) və 222-ci maddələri ilə (Qanunsuz olaraq silahın, odlu silahın əsas hissələrinin, döyüş sursatlarının əldə edilməsi, təhvil verilməsi, satışı, saxlanması, daşınması, ötürülməsi və ya daşınması) cinayət işi açılıb”.
Səfərbərlik elan olunandan sonra isə 261 min nəfərin Rusiyanı tərk etdiyi bildirilir.
Bu xəbəri “Novaya qazeta” Rusiya Prezident Administrasiyasındakı (AP) mənbəyə istinadən yayıb.
Rusiya Prezidenti Vladimir Putin sentyabrın 21-dən etibarən qismən səfərbərlik elan edib.
Bu barədə Vladimir Putin sərəncam imzalayıb.
O, xalqa müraciətində deyib ki, bu qərar Rusiyanın suverenliyinin və bütövlüyünün qorunub saxlanılması məqsədilə verilib.
V.Putin yalnız ehtiyatda olan rusların hərbi xidmətə çağırılacağını vurğulayıb.
Prezident çıxışı zamanı Rusiyanın nüvə silahından istifadə ehtimalı ilə bağlı xəbərdarlıq edib.
Xatırlatma
Rusiya Prezidenti Vladimir Putin Ukraynanın şərqindəki separatçı qurumları tanıdığını bəyan etdikdən 2 gün sonra, fevralın 24-də Ukraynaya qarşı müharibəyə başlayıb.
Dünyanın əksər ölkəsi Rusiyanın hücumunu pisləyib.
Bundan sonra Avropa Birliyi ölkələri, eləcə də ABŞ Rusiyaya qarşı sanksiyalar tətbiq edib.
600-dən çox rusiyalı oliqarx, yüksək rütbəli hərbçilər, şirkət sahibləri, biznesmenlərlə yanaşı, Rusiya Prezidenti Vladimir Putin və xarici işlər naziri Sergey Lavrov sanksiyalara məruz qalıblar.
Rusiyada təşkil olunacaq yarışlar təxirə salınıb, bu ölkənin adı mühüm tədbirlərdən və təşkilatlardan çıxarılıb.
Aprelin 7-də isə BMT Baş Assambleyası Rusiyanın təşkilatın İnsan Hüquqları Şurasından çıxarılması ilə bağlı qətnamə qəbul edib.
Rusiya isə Avropa Şurası üzvlüyündən çıxıb.
Rusiya ordusunun Buça və digər Ukrayna şəhərlərində kütləvi qətliamlar və müharibə cinayətləri törətdiyi iddia olunur.
İyunun 25-də Avropa İttifaqının 12 ölkəsi Rusiya qazının tədarükündən tamamilə və ya qismən imtina edib.
