İranda kütləvi etirazlar və genişmiqyaslı internet qapanması fonunda, hakimiyyət orqanları ölkə üzrə müxtəlif həbsxanalarda ən azı 17 məhbusun ölüm hökmünü icra edib.
Bu barədə yanvarın 19-da İran İnsan Haqları Aktivistləri Xəbər Agentliyi (HRANA) məlumat yayıb.
HRANA-nın əldə etdiyi məlumata əsasən, yanvarın 17 və 18-də ölkə üzrə bir neçə həbsxanada edam icra olunub. Həbs olunanlar narkotikdən istifadə ilə yanaşı, “Allaha düşmənçilik” kimi qeyri-müəyyən ittihamlar üzrə məhkum ediliblər.
HRANA bildirir ki, İranda 2025-ci il dekabrın 28-dən başlayan etirazlar zamanı internet kəsilib və ölkə üzrə məlumatlar məhdudlaşdırılıb, bu şəraitdə edamlar məhbusların hüquqlarını pozur və onların həyatını təhlükəyə atır.
Hesabatın hazırlandığı dövrdə icra olunan edamlar həbsxana rəsmiləri və müvafiq qurumlar tərəfindən rəsmi olaraq elan olunmayıb.
Norveçdə fəaliyyət göstərən “Iran Human Rights” təşkilatının illik hesabatına görə, 2025-ci ildə İranda ən azı 2 063 nəfər edam edilib. Bu, 2024-cü illə müqayisədə edamların 119% artması deməkdir. 2024-cü ildə 972 nəfərin edam olunduğu bildirilirdi.
