İyunun 19-da dini inanclı fəal Samid Hüseynovun həbs olunduğu deyilir.
Bu barədə fəalın həyat yoldaşı Arzu Hüseynova Meydan TV-yə məlumat verib.
O bildirib ki, iyunun 19-da həyat yoldaşı Bakının Zabrat qəsəbəsində yerləşən polis idarəsinə çağırılıb. Daha sonra günlərlə ondan xəbər ala bilməyib:
“Ayın 19-u səhər dedi ki, Zabratda polis idarəsindən zəng edib çağırıblar, ora gedəcəm. Bir neçə saat sonra zəng etsəm də, telefonu açmadı”.
Arzu Hüseynova deyir ki, hadisədən 3 gün sonra, iyunun 22-də yoldaşının harada olması barədə məlumat ala bilib. Onun sözlərinə görə, 15-ci polis bölməsindən bildiriblər ki, Samid Hüseynov hazırda Binəqədi müvəqqəti saxlama təcridxanasında saxlanılır.
“15-ci bölmədən zabit mənə dedi ki, Binəqədidə saxlanılır. Burda iki gün saxlanılıb, ora göndərilib. Dedim ki, mənə nömrə verin, dedilər orda nə zənglə danışa bilərsiz, nə də ki, görüntüylə, nə də görüş olar”, – deyə Arzu Hüseynova bildirib.
Hüseynova deyir ki, 15-ci polis bölməsindən bildirilib ki, Samid Hüseynov xuliqanlıq maddəsi ilə saxlanılıb.
Samid Hüseynov 2023-cü ildə narkotik ittihamı ilə saxlanıb və 2 il müddətinə həbs edilib. Ailəsi bu ittihamları qəbul etməyib və fəalın şərlənərək həbs edildiyini deyib.
