“Biz artıq sərt “gestapo” rejimində yaşadığımızın fərqindəyik”
Siyasi gündəm Demokratik Qüvvələrin Milli Şurası (DQMŞ) ətrafında baş verən olaylardır. DQMŞ-nin üzvü olan əsas aparıcı partiyanın – AXCP üzvülərinin həbsi, qurumun qapalı toplantılarından sosial şəbəkələrdə paylaşımlar bir sıra suallar doğurur.
Meydan TV həmin suallara DQMŞ-nin Koordinasiya Mərkəzinin üzvü Gültəkin Hacıbəylidən cavab almağa çalışıb.
– Gültəkin xanım, təmsil olunduğunuz Milli Şura videokonfransların yayılması haqda bəyanat yayıb. Ancaq müəyyən suallar qalır. Məsələn, bir müddət əvvəl sizin ABŞ diplomatı ilə telefon danışığınız Real tv-də yayınlanmışdı. Onun ardınca belə bir paylaşımın da olacağını gözləyirdinizmi?
– Açığı, “Azercell” və digər mobil operatorlar üzərindən təxribatın olacağını gözləyirdik. Ona görə də bir qayda olaraq mobil operatorlar vasitəsilə söhbətlər etmirdik. Eyni zamanda, Koordinasiya Mərkəzinin iclaslarında da telefonlarımızı tamamilə uzaq məsafədə saxlayırdıq ki, müdaxilələrin qarşısı alınsın. Amma bütün dünyada işlədilən qlobal şəbəkə ZOOM üzərindən kobud müdaxilənin olacağını gözləmirdik. Yəqin ki, gözləsəydik, o qədər rahat şəkildə müzakirələr aparmazdıq. Kim düşünə bilərdi ki, Azərbaycan hakimiyyəti hətta beynəlxaq şəbəkələr üzərindən çirkli bir cinayət edəcək səviyyədə özünü azğın və qanunazidd aparar? Əgər belə düşünə bilsəydik, ZOOM üzərindən heç bir müzakirə aparmazdıq.
–
Əgər sizin ABŞ diplomatı ilə telefon danışıqlarınız yazılır və yayımlanırsa, ehtiyat tədbirləri də görməli deyildinizmi?
– Məsələ ondadır ki, diplomatla söhbət sosial şəbəkə üzərindən yox, yalnız “Azercell” üzərindən həyata keçirdiyim danışıq idi. Bu da bizdə arxayınlıq yaratmışdı ki, Azərbaycan hökuməti sosial şəbəkələrə müdaxilə edə bilmir, yalnız mobil operatorlar üzərindən danışıqları izləyib yayır. Məhz bundan sonra mobil operatorlardan danışıqlarımıza məhdudiyyət qoyduq, toplantılarımızda və ya ikili görüşlərimizdə də məsafələri gözləməli olduq.
–
Yəqin ki, bundan sonra bütün tədbirlərinizdə baş verənləri nəzərə alacaqsınız?
– Biz artıq sərt “gestapo” rejimində yaşadığımızın fərqindəyik. Əgər əvvəllər sərt avtoritarizmdən danışırdıqsa, indiki vəziyyət fərqlidir, sərt “gestapo” rejimidir. Məsələ ondadır ki, insanlar evlərində dostlarıyla səmimi söhbət də edə bilməzlər. İstisna etmirəm ki, mətbəxdə oğlumla, yaxud anamla, bacımla telefon danışıqlarım yazılır. Bu, o qədər iyrənc siyasətdir ki, ad qoymaq da çətindir. Digər tərəfdən, yayılan video görüntülərdə Milli Şuranın siyasəti ilə təzad təşkil edən heç nə yoxdur, biz ictimaiyyət qarşısında da fikirlərimizi açıq deyirik. Bizi ReAL və Müsavat partiyaları haqqında fikirlərə görə qınayırlar, məgər, ondan da qat-qat sərt mövqeyimizi sosial şəbəkələrdə, canlı yayımlarda səsləndirmirik?! Hətta video toplantıda çox yüngül formada səthi fikir səsləndirib, daha ciddi məsələlərin müzakirəsinə keçmişik. Təsəvvür edin ki, 4 saatlıq toplantının 2-3 dəqiqəsi yayılır, o da seçmə üsuluyla. Çünki tam yaymaq hökumətə sərf etmir. Bir məqamı vurğulayım, bu hadisələrdə Azərbaycan cəmiyyətinin zəif olduğunu gördük, söhbət xalqdan getmir. Çünki xalqımızın qayğıları çoxdur və Milli Şura olaraq üzərinə getdiyimiz problemlərlə onlar eyniyyət təşkil edir. Amma vətəndaş cəmiyyətində kövrəklik olduğundan hakimiyyət istədiyi vaxt onu manipulyasiya edir. Və cəmiyyət məsələnin kibercinayət olduğunu deyib üzərinə gəlmək əvəzinə Milli Şuranın toplantılarında nələrin danışıldığını müzakirə predmetinə çevirdi. Halbuki, iclasdakı söhbətin məzmununda qeyri-adi heç nə yox idi. Ona görə toplantıdan qısa-qısa hissələrin yayılmasına reaksiya tamamilə fərqli olmalıydı.
– Gültəkin xanım, Milli Şura baş verənlərlə bağlı hüquqi addımlar atacaqmı?
– Bu, yalnız mənə qarşı hücum deyil, bütövlükdə Milli Şuraya qarşı təxribatdır. Çünki video-konfransda Koordinasiya Mərkəzinin bütün üzvləri iştirak edib. İstənilən normal cəmiyyətlərdə belə hadisələr olanda ilk növbədə məhkəmələrə müraciət edilir. Konkret olaraq, mən diplomatlarla telefon danışığımın yayılmasından sonra məhkəmədə iddia qaldırmışam, bütün instansiyalar keçilib, Avropa Məhkəməsinə də müraciət edəcəm. Yaxud mənim şəxsiyyətimlə hakimiyyətin çirkli təbliğat qurması, yaxud adıma saxta “İnstagram” səhifəsi açılması haqda məhkəmələrə şikayət etmişəm. Amma heç birinin nəticəsi olmayıb. Biz sadəcə olaraq, Avropa Məhkəməsinə şikayət hazırlamaq üçün yerli instansiyaları keçməli olduq. İndi vəziyyət fərqlidir, yenə də eyni mərhələni keçməliyik. Əvvəla, Respublika Prokurorluğuna müraciət etsək, hüquq-mühafizə orqanlarında sosial şəbəkə hesablarımıza müdaxilə imkanı yaranacaq. Ona görə də hələ düşünür və hüquqşünaslarla məsləhətləşirik. Yekun nəticə barədə ictimaiyyətə məlumat verəcəyik.
– Bəs ZOOM şirkətinə müraciət edəcəksinizmi?
– Bəli, müraciət edəcəyik. Amma ilkin müraciət etmişik, ZOOM-un cavabı bundan ibarətdir ki, şəbəkə həmin konfrasları özü qeydiyyata almır, belə bir arxivi yoxdur, heç kimə də satmır. Daha sonra əlavə ediblər ki, ZOOM-da qeydiyyat aparmaq üçün bütün iştirakçıların razılığı lazımdır. Hətta təşkilat qeydiyyat aparırsa, video konfransda iştirak edən hər bir adamın razılığı olmadan qeydiyyat apara bilməz. Eyni zamanda, ayrı-ayrı insanlar da təşkilatın razılığı olmadan qeydiyyat apara bilməz. Mən bir məsələni demək istəyirəm, xüsusi xidmət orqanlarının bizim toplantıları sosial şəbəkə üzərindən açıq şəkildə və utanmadan izləmə həyata keçirirlər. Adi bir fakt deyim, aprelin 13-dən sonrakı ZOOM üzərindən keçirdiyimiz toplantıda artıq səsimizin yazıldığını bilirdik və onlar da özlərini gizlətmirdilər. Ekranda yaranan əlavə pəncərələrin sayı hədsiz artmışdı, mən təşkilatçı kimi pəncərələrin birini bağlayanda, digəri açılırdı, sanki, konfrans gedə-gedə bizə əzələ nümayiş etdirirdilər. Ən sonda izləyənləri gözləmə rejiminə atdım ki, daxil ola bilməsinlər, onda iştirakçıların adlarının qarşısında pornoqrafik şəkillər yüklədilər və mən o şəkillərdən birini skrin edə bildim.
–
Deməli, dinlənildiyinizi artıq bilirdiniz?
– Bəli. Eyni zamanda, bizimlə paralel daxil olurdular, konkret olaraq, Namizəd Səfərovun və mənim adımdan iki pəncərə açılırdı, Vahid Məhərrəmovun adından isə 3 pəncərə açılmışdı. Bunların skrinləri var. Yaxud Fuad Qəhrəmanlının adından 1 pəncərə açılmışdı, orda onların “recorder” proqramının loqosu da yazılmışdı. Yəni həyasızcasına daxil olduqlarını gizlətmirdilər, sanki özlərini bizimlə məzələnmiş kimi aparırdılar.
–
Olmazdı ki, elə həmin vaxt baş verənləri ictimailəşdirərdiniz?
– Bunlar aprelin 13-dən sonra keçirilən konfranslarda baş verib, ona qədər izlənildiyimizi bilmirdik. Biləndən sonra müzakirələr aparmaq üçün toplandıq, Avropada yaşayan dostlarımız, Qənimət bəy fərqli şəbəkələr vasitəsilə əlaqə yaratmağa çalışdı. Yenidən cəhd etdik, yenə qoşulan kimi əlavə pəncərələr açılır və müdaxilələr olurdu.
–
İndi isə keçək yayılan video-konfranslardakı müzakirələrə. Sizin haqqınızda deyirlər ki, siyasi söhbətləri qeybət səviyyəsinə endirmisiniz. Bu mənada barənizdə olan tənqidləri haqlı sayırsınızmı? Məsələn, konkret olaraq, yeni yaranan BİZ platforması haqqında birbaşa sərt, ironik ifadələr işlədilir…
– Yox, tənqidləri qətiyyən haqlı saymıram. Ümumiyyətlə, mən kiminsə məxfi, gizli söhbətlərinə heç vaxt qoşulmuram. Məsələn, kimsə mənim haqqımda başqasının fikrini deyirsə, onun özünə “nahaq yerə bunu mənə deyirsən, əgər həmin adamın ciddi narazılığı olsaydı, özü deyərdi” söyləyirəm. Bilirsiniz, insan təbiətidir, nəyəsə əsəbləşib ilkin reaksiya verə bilər, necə ki, ailə üzvlərimiz barədə də əsəbləşəndə nəsə deyirik. Bu, o demək deyil ki, onlar barədə belə düşünürük, xeyr, yeri gələndə, doğmalarımız üçün həyatımızı da qurban verərik. Amma insan əsəbləşəndə, hər hansı emosional ifadə də işlədə bilər. O cümlədən, BİZ platformasında olanlarla bağlı müəyyən fikirlər səsləndirilib, digər dostlar da fürsətçil demişdi. Amma BİZ platformasında təmsil olunan Arif Məmmədova da, Qubad İbadoğluna da, Rüfət Səfərova da, Nəsimi Məmmədliyə də, elə hamısına böyük hörmətimiz var, onlar bizim üçün dəyərli insanlardır. Əslində, onlardan gözləntimiz fərqlidir, biz bu insanları həmişə özümüzlə bir yerdə görmək istəyirik. Təbii qısqanclıq məsələsidir ki, istərdik bir yerdə olaq. Ona görə də qeyri-adi bir şey olmayıb, siyasi təşkilatın daxili müzakirələrində belə məsələlər olur. İstərdik ki, onlar bizimlə bir çətir altında olsun, cəmiyyət də real alternativi görsün. İctimaiyyət görəndə ki, real alternativ var, o zaman seçimini edir. Bir daha deyirəm, BİZ platformasında olanlara hörmətimiz var, dost kimi görürük. Bir məqamı vurğulayım, konfransdan yayılan video görüntülər montaj edilib, 3-4 saatlıq iclasdan 2-3 dəqiqəsini ictimailəşdirirlər və elə təqdim olunur ki, iclaslarda Hacıbəylidən başqa danışan yoxdur. Necə ola bilər ki, böyük bir təşkilatda yalnız mən danışıram və başqa heç kim fikir səsləndirmir? Yəni bu dəfə hakimiyyətin hədəfi olduğum üçün yalnız mənim çıxışlarım səliqə ilə seçilib montaj edilib və hakimiyyət istədiyi formada yayır. Ona görə də hər bir düşünmə qabiliyyəti olan adam bunun bir nəfərə yönəlik məqsədyönlü kampaniya olduğunu görür.
– Bəs siz ReAL və Müsavat partiyaları barədə dediklərinizdə qalırsınızmı?
– Bəli, fikirlərimdə heç bir dəyişiklik yoxdur, ondan da qat-qat əhatəli münasibətimi sosial şəbəkələrdə yazmışam. Hörmətli sədrimiz Cəmil müəllim də ReAL və Müsavat partiyaları ilə bağlı statusunda fikirlərini əsaslandırıb. Mən bu gün də o fikirdəyəm ki, ReAL Partiyasının son vaxtlardakı davranışları hakimiyyətyönlü və hakimiyyətin maraqlarına xidmət edir. Bu gün də o fikirdəyəm ki, Müsavat Partiyası Tofiq Yaqubluya qarşı çox haqsızlıq edib, onun haqqına girib və bununla da cəmiyyətdə nüfuzunu itirib.
– Amma qarşı tərəf sizin və Cəmil müəllimin üzr istəməsini tələb edir…
– Üzrhaqlığı anlamıram, biz siyasi mövqeyimizə görə niyə üzr istəməliyik? Üzr istəməli tərəf onlardır, dəfələrlə bizi də təhqir ediblər, günü bu gün hər iki partiyada, xüsusilə Müsavat Partiyası tərəfindən mənə qarşı səviyyəsiz kampaniya aparılır. Mən heç kimin şəxsi həyatına müdaxilə etməmişəm, aşağılayıcı fikirlər səsləndirməmişəm, sosial şəbəkələrdəki statuslarımda da Müsavat Partiyasının mövqeyini açıq şəkildə tənqid etmişəm. İkinci, çox üzülürəm ki, siz daha çox bununla bağlı sual verirsiniz. Müsavat və ReAL partiyaları Milli Şuraya qarşı kibercinayəti qınayıblarmı, pisləyiblərmi? Onların məlumatları varmı ki, 1974-cü ildə eyni məzmunlu cinayətə görə ABŞ prezidenti Nikson istefaya getməyə məcbur oldu?! Təsəvvürləri varmı ki, belə hadisə aparıcı dövlətin prezidentinin istefasıyla nəticələndi? Bilmirlərsə, bu adamlar hansı siyasi biliklərdən və bacarıqdan danışırlar? Yox, cinayət olduğunu bilirlərsə, onda mənə qarşı hücumlarda yer almaqla kibercinayətin iştirakçılarına çevrilirlər. Sosial şəbəkələrdə həmin video görüntüləri yayan, paylaşan, şərhlərlə çıxış edənlər avtomatik olaraq kibercinayətin iştirakçılarına çevrilirlər. Bu, birinci hadisə deyil, bizdən öncə də kimlərinsə yatağının video görüntüsü paylaşılıb, biz də ona müdaxilə etməmiş, təzyiqlə üzləşənlərin yanında olmuşuq.
– Şəxsi həyat demişkən, sizin jurnalist İsmail Cəlilov barədə söylədikləriniz şəxsi həyata müdaxilə deyilmi?
– Hansı şəxsi həyata müdaxilə etmişəm? Birincisi, adını çəkdiyiniz şəxs uzun müddətdir statuslarında açıq mətnlə məni təhqir edib, dəfələrlə haqqımda təhqiramiz fikirlər səsləndirib. Bunu deyən insanlar ona görə riyakardılar ki, onun haqqımda yazdığı təhqirlərinə reaksiya verməyiblər. İkinci, adam “Facebok” statusu yazıb və açıq mətnlə şəxsi ailəsini təsvir edib, qapalı olmayıb. Necə olur ki, bu adam dəfələrlə şəxsiyyətimi təhqir edir, öz əri haqqında açıq mətnlə paylaşımlar edir və mən də bunları daxili qrupda səsləndirəndə onun şəxsi həyatına müdaxilə sayılır? Əgər özəl həyat idisə, zəhmət çəkib, onu bizdən qoruyub, statuslarında paylaşmazdı. Əgər sən sosial şəbəkə statuslarında bütün dünyaya şəxsi həyatının detallarını paylaşırsansa, sən başqalarından necə məxfilik tələb edirsən?! Mən isə ümumiyyətlə, statuslarımda bu adamın adını belə çəkməmişəm, nəinki şəxsi həyatından yazmışam. Amma belə yanaşma primitivdir, adam on dəfələrlə öz həyatı haqqında status yazır, başqa tərəfdən hökumət bir siyasi təşkilatın qapalı toplantısına daxil olub, orda publik söhbətlərdə açıqlanan şəxsi həyat barədə danışılanları yayır, ardınca biz hədəf oluruq. Burda ədalət meyarı hardadır?!
– Qapalı iclaslardan yayılan fraqmentlərdən sonra Milli Şuranın missiyasının çoxdan başa vurduğunu və buraxılmasının vacibliyini qeyd edənlər də az deyil. Belə düşünənlər fikirlərini daha çox iclasların qeybət səviyyəsinə endiyini, başqa təşkilatlar və media orqanları barədə deyilənləri əsas gətirir.
– Hesab edirəm ki, belə fikir səsləndirənlər də qərəzlidirlər. Siz də bunu təkrar etməklə qərəz ifadə edirsiniz. Niyə? Birincisi, bizim haqqımızda qərəzli fikirlər səsləndirənlər “Facebook”da Milli Şura barədə dəfələrlə qeybət ediblər. Biri var bir təşkilat qapalı toplantısında söhbət etsin, biri də var kimsə Milli Şura haqqında məzmunsuz və mənasız fikirləri publik şəkildə yayımlasın. Çox adlar çəkə bilərəm, nə yazıq ki, onlar da sizin təmsil olunduğunuz media orqanına yaxın insanlardır. Bu adamlar Milli Şura ilə bağlı qeybət xarakterli statuslar yazırlar.
–
Ancaq bu, Meydan TV demək deyil axı, siz bu kanalın sizə qərəzli olduğunu deyirsiniz…
– Fikrimi tamamlayım, siz həmin deyilənləri təkrarlayırsız…
– Mən sitat gətirirəm, özüm demirəm…
– Kimsə deyirsə… Qeybət kiminsə saçının, dərisinin rənginin, boyunun, danışıq tərzinin müzakirəsidir. Biz toplantılarımızda belə müzakirələrə nə zaman yol vermişik? Milli Şura siyasi təşkilatdır və rəqiblərimiz var, həmin rəqiblər bizə qarşı çox amansızdırlar və bir çox halda qurşaqdan aşağı zərbələr də vururlar, böhtan atırlar, yalan danışırlar. Bununla siyasi mübarizəmizə çox ciddi problemlər yaradırlar. Məsələn, hakimiyyətlə dialoqa getmirik. Kimsə gedir və üstəlik bizi hədələyir ki, getməyənləri hökumət tutmaqda düz edir. Ona görə onların mövqeləri müzakirə edilirsə, bu, qeybət yox, siyasi müzakirədir. Kimsə onu qeybət adlandırırsa, deməli, onun düşüncəsi kasaddır və siyasi gedişat haqqında anlayışı yoxdur. Biz indi həmin toplantılarda Şumer-Akkad mədəniyyətini müzakirə etməliydik, yoxsa kimsə özünə yeni kostyum alıb, onu? Milli Şura ilk növbədə beynəlxalq siyasi durumu, ölkədaxili siyasi və iqtisadi-sosial vəziyyəti müzakirə edir. Ən azı 3-4 saatlıq müzakirədə 2-3 dəqiqə başqa partiyalar haqqında sosial şəbəkələrdə yazdıqlarımızı təkrarlamışıq. Əgər bu diskussiya yarım saat aparılsa, hamısını yayarlar, vəssalam. İndi hökumətin trolları şüvən qaldırıb Milli Şuranın qeybət apardığını bildirirlər. Nə yazıq ki, özlərinə müstəqil jurnalist deyənlər və vərəndaş cəmiyyəti nümayəndələri də buna qoşulub dəstək verirlər. Siz ayrı-ayrı media orqanlarının müzakirə olunduğunu deyirsiniz, hansı media orqanından söhbət gedir?
– Məsələn, deyirsiniz ki, Meydan TV sizə qarşı qərəzlidir. Hansı qərəzdən söhbət gedir ki, sizinlə bağlı heç bir məhdudiyyət yoxdur, ən azı mən açıqlama alıram…
– Yox, heç vaxt Natiq Cavadlının adını çəkməmişəm və sizdən də özümə qarşı qərəz hiss etməmişəm. Başqalarını nəzərdə tutub demişəm. Məsələn, orda Meydan TV-yə baxışların endiyi deyilib, yəni bunu demək cinayətdirmi?
– Yox, əlbəttə cinayət deyil, fikrə görə nə cinayət?!
– Açıb “Youtube”a baxın…
–
Əgər Əli Kərimlidən müsahibə almamışıqsa, baxış sayının zəiflədiyini demək absurddur axı. Həm də dəfələrlə canlı yayım üçün müraciətimiz olub…
– Yox, üzr istəyirəm, bu, absurd deyil. Siz nəzərə alın ki, ən çox baxışı olan siyasi lider Əli Kərimlidir. Hətta min baxışı olan kanala o çıxırsa, onda baxış sayı 5-10 minə yaxınlaşır. Bu, gerçəklikdir. İkinci, bizim deməyimizdən asılı olmayaraq açın “Youtube” üzərindən baxışlara baxın, müqayisə edib görəcəksiniz. Nəhayət, insanın fikir azadlığı var, insan məhrəm şəraitdə, öz dostları arasında münasibətini açıq söyləyə bilər. O zaman problem həmin insanda yox, ona irad tutandadır. Bir daha deyirəm, emosional halda dediyim fikir mənim mövqeyimi ifadə etmir, hirslənəndə oğlum haqqında da sərt danışa bilərəm, bu, onu sevmədiyim anlamına gəlməməlidir.
– Məlum olaylardan sonra Milli Şura rəhbərliyində olan iki nəfər istefa verdi, həm bu hadisə, həm də iclasdakı söhbətlərin qurumun yetkin təşkilat olmadığını, tükəndiyini göstərmirmi?
– Yox, sizinlə razı deyiləm. Birinci ona görə ki, Azərbaycan siyasətində heç bir siyasi təşkilata Milli Şura qədər təzyiqlər olmayıb. Yuxarıda adını çəkdiyiniz partiyalara isə heç bir təzyiq göstərilmir. ReAL Partiyası isə təzyiqlərdən qaçdığını, özlərini qoruduqlarını gizlətmir, eyni zamanda, Müsavat Partiyası ilə bağlı da təzyiqlər olduğunu görmürsünüz. Təzyiqlər ancaq AXCP və Milli Şuraya olur. Bu qədər təzyiqdən sonra Milli Şura proseslərin önündədirsə, protest elektoratının əsas flaqmanıdırsa, deməli, qurum özünü təsdiq edib. Adi bir sual; düşünün, niyə heç bir müxalif partiya rəhbərliyində olanların telefonları dinlənilmir, yaxud diplomatlarla söhbətləri yazılmır? Mən Milli Şuranın təmsilçisi olaraq ayda bir dəfə diplomatlarla görüşürəm, amma elə siyasi təşkilat rəhbərləri var ki, hər həftə onlarla görüşürlər. Bəs niyə onların telefon danışıqları, yaxud söhbətləri qeydə alınmır? Çünki həmin təşkilatların fəaliyyəti hakimiyyət üçün ciddi problem yaratmır. Biz hakimiyyət üçün problem olduğumuzdan daim hədəfdəyik. Bu qədər təzyiqin qarşısında hakimiyyəti elə vəziyyətə salmışıq ki, heç nə ilə bizi sındıra bilmədiyindən çirkin vasitələrə əl atır, bizim məhrəm söhbətlərə, yatağımıza girir vən ən iyrənc formada səsimi yazıb montaj şəklində yayır.
Bütün təzyiqlər Milli Şuranın gücünün göstəricisidir. İki nəfərin də şuradan istefa verməsi qurumun gücünün və ictimai rəyə sayğısının göstəricisidir. Amma ən əsas da həmin adamların səsləndirdiyi fikirlərdə müəyyən nöqsanlar vardı. Hətta qapalı çevrədə də olsa, həmin fikirlər səsləndiyi üçün onlar istefaya getdilər. Əminliklə deyirəm, hansı müxalif partiyanın mətbəxinə daxil olsanız, onu Milli Şurayla müqayisə etmək imkanı yaransa, müqayisə olunmaz dərəcədə mənzərə görəcəksiniz. İllərdir izlənirik, 2-3 dəqiqəlik söhbət tapırlar, o da açıq şəkildə deyib yazdıqlarımızdan fərqlənmir. İclasda əsas Rafiq Manaflının səsləndirdiyi fikirdir, mən onu iclasda da sərt şəkildə qınamışam, həmin uyğunsuz ifadədən başqa ittihama əsas verəcək fakt yoxdur.
– Hər halda Milli Şura fəaliyyətinə yenidən baxmalı deyilmi?
– Milli Şura yeniliyə açıq təşkilatdır. Hakimiyyətin bizə qarşı qurşaqdan aşağı zərbə vurmasına, kibercinayətlə təhdidinə səbəb Milli Şuranın demokratiya uğrunda mübarizənin önündə olması əsas verib. Biz hakimiyyət üçün problem yaratmasaq, nöqsanlarını açıq və prinsipial şəkildə, başqalarından fərqli olaraq, tələsən yeri olmayan formada deməsəydik, kibercinayətə əl atmazdılar. Baş verənlər bizim düzgün yolda olduğumuzu sübut etdi. İkinci, əgər DTX tərəfindən hazırlanan və həyata keçirilən bir cinayətə özünə müxalifət partiyası deyənlər şərik olurlarsa, bu təxribatı pisləmək əvəzinə üstümüzə gəlirlərsə, deməli, mövcud siyasi palitrada doğru yolda olan və hədəfi düzgün vuran Milli Şuradır.
