Laşa Qabitaşvili deyir ki, sual verdiyi üçün hücuma məruz qalıb
Əbu-Dabidə “Gürcü Arzusu”ndan olan deputatlar bir gün əvvəl iqtidar partiyasının siyasətini tənqid edən vətəndaşa hücum ediblər.
Hadisə Əbu-Dabidəki “Radisson Blu” otelində baş verib və nəticədə videoya çəkilən xaotik mənzərə sosial mediada gündəm olub.
Hadisə “Gürcü Arzusu”nun deputatları İrakli Zarkua, Viktor Sanikidze və Gela Samxarauli ilə bağlı olub.
Onların hücum etdiyi şəxsin Gürcüstan vətəndaşı Laşa Qabitaşvili olduğu müəyyən edilib.
İctimaiyyətə açıq olan məlumatlara əsasən, Qabitaşvili siyasi fəaldır, lakin Gürcüstan siyasəti ilə birbaşa əlaqəsi olmayan vətəndaşdır.
Laşa Qabitaşvilinin qardaşı Davit 2015-ci ilin iyununda, Tbilisidə azı 20 nəfərin ölümü ilə nəticələnən daşqında həlak olub.
Onun ailəsi bir neçə dövlət qurumunu, o cümlədən Daxili İşlər Nazirliyini, Fövqəladə Hallar İdarəsini və Milli Ətraf Mühit Agentliyini səhlənkarlıqda ittiham edərək məhkəməyə verib.
Keçən il apelyasiya məhkəməsi ailənin iddiasını qismən qəbul edərək Tbilisi Polis Departamentinə dəymiş mənəvi ziyana görə təzminat ödəmək öhdəliyi qoyub.
Laşa Qabitaşvili “Azadlıq” radiosuna verdiyi açıqlamada bildirib ki, məhkəmə “fəlakətli daşqın zamanı sistemin işləmədiyi” ilə bağlı iddiaları təmin etməyib, ona görə də o, bu qərarı yetərli saymır.
Deputatlarla vətəndaşın qarşıdurması isə bazar ertəsi otelin yeməkxanasında baş verib.
Sosial mediada paylaşılan və hadisənin başlanğıcını əks etdirən videoda deputat Zarkua səhər yeməyi yeyən Qabitaşvilinin yanına yaxınlaşır, daha sonra onun üzünə yemək atır və qarşıdurma yaşanır.
Eyni anda deputat Sanikidze də mübahisəyə qoşulur.
Başqa bir video göstərir ki, Qabitaşvili Zarkuanın üstünə tullanıb onu döyərkən Sanikidze arxadan Zarkuanı tutaraq Qabitaşvilini vurur.
Digər videoda Qabitaşvili və deputatların bir-birini təhqir etdiyini görmək olur.
Təhqirlərdən birinə cavab olaraq, Sanikidze çıxışa doğru gedərkən geri dönüb Qabitaşviliyə yenidən hücum edir, lakin Qabitaşvili özünü müdafiə edərək qarşılıq verir.
Bu anda deputat Samxarauli də Qabitaşviliyə fiziki zərbə vurur.
“OC Media” hadisə ilə bağlı şərh almaq üçün həm Əbu-Dabi polisinə, həmçinin “Radisson Blu”ya müraciət edib.
Hadisədən sonra çəkildiyi ehtimal edilən fotoda görünür ki, orada polis əməkdaşı da olub və Zarkuanın qarşısında dayanıb, amma hələlik heç bir rəsmi açıqlama yoxdur.
Qabitaşvili dava ilə bağlı videomüraciət yayıb.
O qeyd edib ki, Zarkua və digərləri ona həyat yoldaşı ilə səhər yeməyi yeyərkən hücum ediblər.
O vurğulayıb ki, hakim partiyanın deputatları, yəqin ki, ötəngünkü şifahi qarşıdurmadan qıcıqlanıblar.
Onun üzündə qançırlar videodan aydın görünür.
Davadan əvvəl nə baş verib?
Qabitaşvili ilə “Gürcü Arzusu” Partiyasının deputatları arasındakı qarşıdurma ötən gün həmin oteldəki mübahisədən sonra baş verib.
Qabitaşvili telefon kamerası ilə çəkiliş edərkən Zarkua və digər deputatların yanına yaxınlaşıb və onlara Batumidə nümayişçilərin stikerləri yapışdırdıqları üçün polis tərəfindən həbs edildiklərini bilib-bilmədiklərini soruşub.
Həmçinin Tbilisidə saxlanılan etirazçılara polisin işgəncə verməsi barədə xəbərdar olub-olmadıqlarını soruşub.
Zarkua Qabitaşvilinin telefonunu onun əlindən almağa çalışıb və onlar bir-birlərini söyməyə başlayıblar.
Qabitaşvili Zarkuanı “qul” və “satqın” adlandıraraq ona “xalqın bu xəyanəti bağışlamayacağını” deyib.
“Qul” sözü son bir il ərzində Gürcüstanda hökumət əleyhinə keçirilən nümayişlərdə polis və “Gürcü Arzusu” vəzifəlilərini qarşı ifadə etmək üçün tez-tez istifadə olunan deyim halına gəlib.
Daha sonra Qabitaşvili “Facebook”da yazıb ki, o, deputatların yanına “Gürcü Arzusu”nun hərəkətlərini xatırlatmaq, həmçinin “yeni seçkilər keçirilməsi və insanların həbsdən azad edilməsini” vurğulamaq üçün gedib.
“Amma Zarkua telefonumu yerə çırpdı və məni təhqir etdi”, – deyə Qabitaşvili yazıb.
Qarşıdurmanın geniş yayılmış videosuna cavab olaraq, Zarkua da sosial media hesabında hadisəni “təxribatçıların səhnələşdirilmiş çıxışı” adlandıraraq paylaşım edib.
Zarkua öz yazısında Qabitaşvili barəsində alçaldıcı və təhqiramiz üslubla yazıb.
Son zamanlar vətəndaşlar dəfələrlə küçələrdə, hava limanlarında və başqa yerlərdə, o cümlədən xaricdə “Gürcü Arzusu”nun deputatları ilə üz-üzə gəlib, onları Rusiya tipli qanunların qəbuluna və hökumətin Aİ-ə qarşı U-dönüşünə görə tənqid ediblər.
Bu yazı ingilis dilindən tərcümə edilmişdir. Yazının əslini “OC Media”dan oxuya bilərsiniz.
