Jurnalistin telefonu və əşyaları da əlindən alınıb
Çexiyalı jurnalist Rey Beysli (Ray Baseley) qarşıdan gələn parlament seçkiləri ərəfəsində Gürcüstana buraxılmayıb. Telefonu və digər əşyaları əlindən alınaraq 17 saatdan çox saxlanılıb.
“OC Media” yazır ki, oktyabrın 23-də saat 20:00 radələrində Praqadan olan müstəqil jurnalist Beysli heç bir izahat olmadan Gürcüstana girişinin qadağan edildiyini “X” səhifəsində yerləşdirib.
O, həmçinin bildirib ki, hətta Gürcüstan sərhəd nəzarəti də ona niyə buraxılmadığını bilmir. Yazısının bir hissəsi olaraq o, imtinanın “Gürcüstan qanunlarında nəzərdə tutulmuş digər hallarla” bağlı olduğunu bildirən sənəd paylaşıb.
Oxşar hallar əvvəllər də olub.
Çərşənbə günü günortadan sonra Beyslinin ortağı Mariya Kaplina bildirib ki, o, Tbilisi hava limanında 17 saat telefonsuz saxlanıldıqdan sonra zəng edə bilib. Kaplina deyib ki, Çexiya konsulluğunun nümayəndələri jurnalistin işi üzərində işləyirlər.
Beysli Ukraynanın “Kyiv Independent” nəşrindən oktyabrın 26-da Gürcüstanda keçiriləcək parlament seçkilərini işıqlandırmaq üçün sifariş alıb.
“Kyiv Independent” baş redaktorunun müavini Toma İstominanın sözlərinə görə, Beysli əvvəllər nəşrdə fotoqraf kimi çalışıb, başqa bir müxbirlə konfransı işıqlandırıb. O, “OC Media”-ya bildirib ki, o, daha sonra Gürcüstan seçkiləri, Rusiyanın Gürcüstana təsiri və digər əlaqəli mövzularda çıxış edib və bir sıra tapşırıqlar alıb.
Toma İstomina əlavə edib ki, çərşənbə axşamı gecəsi “X”-də yazdığı yazıdan bəri Bayslidən xəbər yoxdur.
Çərşənbə günü dərc olunan məqalədə “Azadlıq” Radiosu Çexiya səfirliyinə istinadla yazır ki, bu, çex jurnalistinin Gürcüstana girişinə ilk dəfə icazə verilməməsidir. Onlar həmçinin qeyd ediblər ki, Beysli əvvəllər də dəfələrlə Gürcüstanda olub.
Həmin gün Gürcüstan Jurnalistika Etikası Xartiyası Beyslinin Gürcüstana girişinə qadağa qoyulması qərarını pisləyən bəyanat yayaraq bildirib ki, seçkiləri işıqlandırmaq üçün xarici jurnalistlərə çıxışı təmin etmək Gürcüstan hökumətinin məsuliyyətidir.
Çərşənbə günü günortadan sonra gürcü jurnalist Anna Qvarişvili bildirib ki, o, Beyslinin vəkili Şota Tutberidze ilə danışıb və o, onun oktyabrın 26-da Praqaya növbəti uçuşuna qədər həbsdə olduğunu təsdiqləyib. Jurnalistin deportasiya otağından çıxmasına icazə verilməsə də, hakimiyyət Beyslinin saxlandığını inkar edir və həmçinin Tutberidze ilə danışmasına icazə vermir. Daxili İşlər Nazirliyi hələlik məsələ ilə bağlı açıqlama verməyib.
Son illər Rusiya, Ermənistan və Belarusdan, eləcə də digər ölkələrdən olan bir sıra jurnalistlərə, həmçinin Gürcüstanın müxalifət partiyalarının qərbli siyasi məsləhətçilərinə Gürcüstana giriş qadağan edilib. Bununla belə, Qərb jurnalistlərinin ölkəyə buraxılmaması hallarına çox az rast gəlinir.
Sentyabrda gürcü-erməni “Aliq Media” media orqanının təsisçisi Arsen Xaratyanın ölkəyə girişi qadağan edilib və deportasiya edilməzdən əvvəl Tbilisi hava limanında bir neçə saat saxlanılıb.
Həmin ayın əvvəlində belaruslu jurnalist Andrey Meleşko da bir neçə il ölkədə yaşamasına baxmayaraq, Gürcüstana buraxılmayıb.
Onların hər ikisi “Gürcüstan qanunvericiliyində nəzərdə tutulmuş digər hallar” səbəbindən ölkəyə girişdən imtina edildiyini bildirən sənədlər alıb.
2023-cü ilin noyabrında Müxalif Vahid Milli Hərəkat (UNM) Partiyasının britaniyalı siyasi məsləhətçisinin Gürcüstana girişinə icazə verilmədikdən sonra Sosial Ədalət Mərkəzinin direktoru Tamta Mikeladze “OC Media”ya bildirib ki, Dövlət Təhlükəsizliyi Xidməti 2023-cü ilin noyabrında Gürcüstana girişi qadağan edən şəxslərin siyahısını hazırlayıb.
“Hansı standartla, hansı sübutla, şəxsin kim tərəfindən bu siyahıya salınması qanunla tənzimlənmir”, – Mikeladze deyib.
Bu yazı ingilis dilindən tərcümə edilmişdir. Yazının əslini “OC Media”dan oxuya bilərsiniz.
