Bu barədə məhkəmə qərar verib
Aprelin 29-da Federal məhkəmə ABŞ Qlobal Media Agentliyinin (USAGM) aprel ayı üçün nəzərdə tutulan vəsaitinin “Azad Avropa/Azadlıq Radio”larına verməsi haqda qərar çıxarıb. Söhbət Konqresin radioya ayırdığı vəsaitdən gedir.
“Məhkəmə Konqresin “Azadlıq” radiosu üçün nəzərdə tutduğu illik vəsaitdən bir aylığının ayrılmasını USAGM üzərinə qoydu. Bu o deməkdir ki, jurnalistlərimiz işlərini davam etdirə, diktatorlar və despotlardan hesabatlılıq tələb edə bilərlər”, – radionun prezidenti Stiven Kapus deyib.
ABŞ Prezidenti Donald Tramp 2025-ci il martın 14-də yeddi federal agentlik, o cümlədən “Azadlıq” radiosu və digər federal yayımçılara nəzarət edən USAGM-də böyük ixtisarlarla bağlı fərman imzalayıb.
Fərmanın dərcindən bir neçə saat sonra USAGM-in adından göndərilmiş məktubda Konqresin “Azadlıq” radiosuna ayırdığı qrantın kəsildiyi bildirilib.
USAGM 50 dildə informasiya yayımına nəzarət edir. Hər həftə bu informasiya 361 milyon izləyiciyə ötürülür.
2025-ci ildə USAGM-in ümumi büdcəsi 950 milyon dollar nəzərdə tutulub.
“Azadlıq” radiosu üçün bu il 153 milyon dollara yaxın büdcə istənilib.
Ardlnca, martın 18-də “Azad Avropa/Azadlıq Radiolar”ı (RFE/RL) ABŞ Qlobal Media Agentliyini (USAGM), eləcə də bu qurumun rəsmiləri Keri Leyk və Viktor Moralesi məhkəməyə verdiyini açıqlayıb.
Martın 25-də ABŞ Kolumbiya Dairə Məhkəməsi RFERL-in USAGM-ə qarşı müvəqqəti qadağa əmri (TRO) haqda vəsatətini təmin edib və radionun bağlanması prosesini dayandırıb.
USAGM-ə “Azadlıq” radiosu, “Amerikanın Səsi”, “Azad Asiya” radiosu, “Kuba Yayımı Ofisi” (Radio Marti), Yaxın Şərq Yayım Şəbəkələri (MBN) və Açıq Texnologiya Fondu (OTF) daxildir.
“Azadlıq” radiosu 23 ölkədə, 27 dildə yayımlanır.
