İxracın və İnvestisiyaların Təşviqi Agentliyi (AZPROMO) Azərbaycan–ABŞ İşgüzar Dəyirmi Masasının təşkili üçün “HIGHLIGHT GROUP” MMC ilə 15 milyon manatdan artıq dəyəri olan müqavilə imzalayıb.
Dövlət satınalmalarının vahid internet portalında dərc olunan məlumata görə, müqavilənin dəyəri 15 087 097 manat təşkil edir.
Müqavilə tender keçirilmədən, “bir mənbədən satınalma” metodu ilə bağlanıb. Bu metod rəqabət olmadan bir şirkətlə birbaşa müqavilə imzalanması deməkdir və adətən satınalma detallarının geniş ictimaiyyətə açıqlanmadığı hallarda tətbiq olunur.
Şirkət cəmi 100 manat kapitalla yaradılıb
“HIGHLIGHT GROUP” MMC 20 sentyabr 2019-cu ildə dövlət qeydiyyatına alınıb. Şirkətin nizamnamə kapitalı cəmi 100 AZN, hüquqi ünvanı isə Bakının Səbail rayonu, Badamdar qəsəbəsində yerləşir. Qanuni təmsilçisi Elnur Hüseynov Həsən oğludur.
Şirkət tədbirlərin təşkili üzrə konfrans dəstəyi təqdim etdiyini bildirir. Xidmətlərə müxtəlif formatlı işgüzar tədbirlərin, konfrans və korporativ teambuilding proqramlarının təşkili daxildir. Eyni zamanda şirkət tədbirlər üçün sinxron və ardıcıl tərcümə xidmətləri, səhnə və texniki təminat məqsədilə səs, işıq, LED ekran və digər avadanlıqların icarəsini həyata keçirdiyini qeyd edir. Bundan əlavə, qonaqlar üçün keytrinq xidməti və ümumi tədbir logistikası da xidmət paketinə daxil edilir.
Diqqətçəkən məqam odur ki, “HIGHLIGHT GROUP” MMC daha əvvəl AZPROMO-nun satınalmalarında da qalib olub və Azərbaycan–İsrail Biznes Forumunun təşkili üçün 88 919 manatlıq müqavilə əldə edib. Yeni müqavilənin dəyəri isə bundan təxminən 170 dəfə çoxdur. Eyni şirkətin oxşar tədbirlərin təşkili üzrə əvvəlki müqavilə məbləği ilə hazırkı 15 milyon manatlıq razılaşma arasındakı ciddi fərq xərclərin hansı əsaslarla formalaşdığı barədə suallar yaradır. Müqavilənin “bir mənbədən” satınalma metodu ilə bağlanması isə bu fərqin səbəbləri barədə ictimaiyyətin məlumat əldə etməsini çətinləşdirir.
Şirkətin rəhbəri kimdir?
Şirkətin qanuni təmsilçisi Elnur Hüseynov özünü beynəlxalq təcrübəyə malik mütəxəssis kimi təqdim edir.
Qeyd etdiyi məlumatlara görə, Hüseynov:
- dilçilik və beynəlxalq münasibətlər üzrə iki magistr dərəcəsinə malikdir,
- İspaniyada təhsil alıb,
- Latın Amerikası və Avropada yaşayıb,
- satış, biznesin inkişafı və beynəlxalq tərəfdaşlıqlar sahəsində 10 ildən çox təcrübəsi olduğunu bildirir.
O, eyni zamanda təlimçi və biznes konsultantı kimi fəaliyyət göstərir, ictimai çıxışlar edir, frilans sinxron tərcüməçi kimi çalışır. Hüseynovun Xəzər Universitetində qonaq müəllim olduğu və köşə yazarı kimi də aktivliyi qeyd edilir.
Müqavilənin 15 milyon manatdan artıq dəyəri tədbirin miqyası və formatı ilə bağlı suallar yaradır. Bazar qiymətləri nəzərə alındıqda, oxşar biznes forum və dəyirmi masaların xərci adətən bundan xeyli aşağı olur. Rəsmi açıqlamada vəsaitin hansı xidmət və xərcləri əhatə etdiyi detallı şəkildə göstərilmədiyindən, məbləğin formalaşması mexanizmi aydın deyil. Mütəxəssislər belə hallarda şəffaflığın təmin olunmasının ictimai etimad baxımından vacib olduğunu vurğulayırlar.
REAL Partiyasının sədri, iqtisadçı Natiq Cəfərli məsələ ilə bağlı bildirib ki, müqavilənin detalları açıqlanmadan məbləğin əsaslı olub-olmadığını qiymətləndirmək çətindir. Onun sözlərinə görə, ilk növbədə sual doğuran məqam satınalmanın niyə açıq və şəffaf tender yolu ilə keçirilməməsi və detalların ictimaiyyətə təqdim olunmamasıdır.
“Bu, dövlət büdcəsinin vəsaitidir, şəxsi vəsait deyil. Belə bir müqavilə kommersiya sirri ola bilməz və şəffaflıq təmin edilməlidir”, – deyə o vurğulayıb.
Ekspert qeyd edib ki, əgər söhbət 20–30 nəfərlik bir dəyirmi masadan gedirsə, 15 milyon manat “fantastik dərəcədə böyük rəqəmdir” və real görünmür. Cəfərli əlavə edib ki, 100–200 nəfərlik nümayəndə heyətinin səfər, aviabilet və otel xərcləri daxil edilsə belə, maksimum 1–1,5 milyon manatlıq büdcə daha məntiqli görünə bilər.
“15 milyon manatlıq vəsait mümkün deyil, bu məsələ dəqiqləşdirilməlidir”, – deyə ekspert bildirib.
