ABŞ Dövlət Departamenti hakimiyyətə çağırış edib
“ABŞ Aytən Məmmədovanın işini diqqətlə izləyir, Azərbaycan hakimiyyətini araşdırma aparmağa və günahkarları məsuliyyətə cəlb etməyə çağırır”.
Bunu ABŞ Dövlət Departamentinin sözçüsü “Turan”a deyib.
Departament sözçüsü bildirib ki, Vaşinqton Azərbaycanda konstitusion hüquqlarından istifadə edən vətəndaşlara qarşı zorakılıq, o cümlədən hücum iddiaları və digər təzyiqlərdən dərin narahatdır.
“Jurnalist Aytən Məmmədovaya hücumu pisləyirik. Bu hücum Ümumdünya Mətbuat Azadlığı Gününün qeyd olunmasından cəmi bir həftə sonra baş verib. Biz bu işi diqqətlə izləyirik, səlahiyyətli şəxsləri araşdırma aparmağa və günahkarları məsuliyyətə cəlb etməyə çağırırıq”, – deyə açıqlamada qeyd olunur.
ABŞ bütün hökumətləri medianın təhlükəsizliyini təmin etməyə, jurnalistlərin zorakılıq, təhdid və ya ədalətsiz həbsdən qorxmadan işlərini yerinə yetirmək imkanlarını qorumağa çağırdığını da bəyan edib.
“ABŞ mətbuat azadlığının və bütün dünyada jurnalistlərin və media işçilərinin təhlükəsizliyinin tərəfdarıdır”, – deyə Dövlət Departamentinin sözçüsü fikini yekunlaşdırıb.
Aytən Məmmədova mayın 11-də Məhkəmə Tibbi Ekspertiza və Patoloji Anatomiya Birliyinin Binəqədi şöbəsində ekspertizadan keçib.
Bu barədə jurnalist özü Meydan TV-yə məlumat verib.
Mayın 8-də gecə saatlarında jurnalist Aytən Məmmədova naməlum şəxsin hücumuna məruz qalıb.
Jurnalistin sözlərinə görə, yaşadığı binanın blokuna girərkən bir nəfər arxasınca gəlib və liftdə bıçağı onun boğazına dirəyib: “Mənə dedi ki, sən ağıllanmayacaqsan? Qızımla hədələdi”.
Jurnalistə hücumla bağlı Cinayət Məcəlləsinin 134-cü (Öldürməklə və ya sağlamlığa ağır zərər vurmaqla hədələmə) maddəsilə Binəqədi Rayon Polis İdarəsinin İstintaq şöbəsində cinayət işi başlanıb.
Aytən Məmmədovanın ən çox ictimailəşdirdiyi iş Tovuz rayonunun Dondar Quşçu kəndində 10 yaşlı Nərmin Quliyevanın oğurlanması, 47 gün sonra kənddə yandırılmış meyitin tapılmasıyla bağlı gedən məhkəmə işidir.
Jurnalist sosial şəbəkələrdə İlkin Süleymanovun günahsız olması, təzyiqlərə məruz qalması ilə bağlı paylaşımlar edirdi.
