Seçkilərdə ifrat sağçı və mühafizəkarların daha aktiv olduğu qeyd olunur
İyunun 9-da Avropa Parlamentinə 4 günlük seçkilər başa çatıb.
Avropanın 27 ölkəsində keçirilən seçkilərdə 360 milyon seçicinin 720 deputat seçdiyi bildirilir.
Seçkilərdə ifrat sağçı və mühafizəkarların daha aktiv olduğu qeyd olunur.
Bu seçki prosesinin Avropada narahatlıq yaradan əsas hadisələrindən biri isə Fransa Prezidenti Emmanuel Makronun qərarı olub.
O, ölkəsində Milli Assambleyanın buraxılması və növbədənkənar seçkilərin təyin edilməsi barədə qərar verib.
Prezident 30 iyun tarixinə birinci, 7 iyul tarixinə isə ikinci tur olmaqla Assambleyanın növbədənkənar seçkilərini təyin edib.
Milli Assambleya Fransa parlamentinin aşağı palatasıdır.
Assambleyanın deputatları qanunların müzakirəsi və qəbulu, habelə zəruri dəyişikliklərin edilməsi ilə məşğul olur.
“Reuters” yazır ki, E.Makron qərarı haqda belə deyib:
“Bu, aydınlaşdırma üçün vacib vaxtdır. Mən sizin mesajınızı, narahatlıqlarınızı eşitmişəm və onları cavabsız qoymayacağam… Fransanın əmin-amanlıq və harmoniya içində hərəkət etməsi üçün aydın səs çoxluğu lazımdır”.
Avropa Parlamentində seçkilərdə qalib gələn Milli Birlik Partiyasının sədri Marin Le Pen bildirib ki, fransızlar qarşıdan gələn seçkilərdə onlara etimad göstərsələr, hakimiyyəti ələ keçirməyə hazırdılar.
E.Makronun İntibah Partiyasından hazırda aşağı palatada 577 deputatdan 169, Marin Le Penin isə 88 deputatı var:
“Əgər Le Pen səs çoxluğu qazanarsa, Makron yenə də müdafiə və xarici siyasətə rəhbərlik edəcək, lakin iqtisadi siyasətdən tutmuş təhlükəsizliyə qədər daxili gündəmi təyin etmək səlahiyyətini itirəcək”.
“Makronun qərarı, Avropa Parlamentində səsvermədə avroskeptik millətçilərin ən böyük qazanc əldə etməsi ilə bütün Avropadakı mərkəzçi partiyalar üçün acınacaqlı bir gecə olduğunu vurğuladı”, – deyə məqalədə qeyd olunur.
Almaniyada müxalifətin mühafizəkar bloku da seçkidə qalib gəlib.
Xristian Demokrat İttifaqı (CDU) və Xristian Sosial İttifaqı (CSU) exit-poll nəticələrinə görə təxminən 30 faiz səs toplayıb.
Avstriyada keçirilən seçkilərdə ifrat sağçı Azadlıq Partiyası öndədir (səslərin 27 faiz) və çox güman ki, Avropa Parlamentindəki yerlərinin sayını iki dəfə artıracaq.
Seçkilərdən sonra Belçikanın Baş Naziri Aleksandr De Kro partiyasının zəif nəticələrinə görə iyunun 10-da istefa verəcəyini açıqlayıb.
Polşada Avropa Parlamentinə keçirilən seçkilərin nəticələrinə görə, hazırkı Baş nazir Donald Tuskun partiyası cüzi fərqlə əvvəlki hakimiyyətdə olan “Hüquq və Ədalət” partiyasını geridə qoyub, üçüncü yeri isə ifrat sağçı – “Anti-Ukrayna” götürüb. Onlar 12,08 faizlə Avropa Parlamentində altı yer əldə edə bilər.
“Ekspertlər deyirlər ki, belə bir nəticə Avropa Parlamentində güc balansını dəyişdirə və sağçılara Avropa İttifaqı siyasətinə – iqlimdən tutmuş miqrasiya və ticarətə qədər həmişəkindən daha çox təsir göstərə bilər. Seçkilərin nəticələri Avropa İttifaqında yüksək vəzifələr uğrunda mübarizəyə başladığı bir vaxtda Avropa təsisatlarına, o cümlədən, Avropa Komissiyasına və Avropa Şurasına kimin rəhbərlik edəcəyi də sual altındadır”.
“Avropa Parlamentinə seçkilərdə ifrat sağçıların qələbəsi Fransada Makron və Almaniyada Şolts üçün heyrətamiz məğlubiyyət deməkdir. İfrat sağçı partiyalar Avropa Parlamentinə mühüm uğur əldə edərək Avropa İttifaqında siyasi qüvvələrin ənənəvi sıralarını sarsıdıblar”, – deyə qeyd olunub.
