“Namizədlərin debatları olacaq”
Hazırda Müsavat Partiyasının başqanı olan Arif Hacılı növbəti müddət üçün partiyanın rəhbəri postuna namizədliyini irəli sürüb.
Müsavat Partiyası
nın qurultayı oktyabrın 12-ə planlaşdırılıb.
Namizədliyinin irəli sürülməsi barədə məlumatı “Facebook” sosial şəbəkəsindəki səhifəsində paylaşan Arif Hacılı oktyabrın 1-dən seçki kampaniyasına başladığını elan edib:
“Platformamı elan edəcəm. Bakıda və rayonlarda qurultay nümayəndələri ilə görüşlərim olacaq. Əsas hədəfimiz şəffaf, nümunəvi bir qurultay keçirmək, cəmiyyətə yeni seçki ənənələri təqdim etməkdir”, – Arif Hacılı yazıb.
O əlavə edib ki, qurultayda seçkilər, səssayma prosesi tam şəffaf, müşahidəçilərin, jurnalistlərin nəzarəti altında keçiriləcək. Tədbir internet TV-lər vasitəsi ilə canlı yayımlanacaq:
“Azərbaycanda siyasi partiyalarının tarixində ilk dəfə olaraq namizədlərin debatı da baş tutacaq. Əminəm ki, Müsavat bu qurultaydan daha da güclənmiş çıxacaq”.
Müsavat Partiyası 1911-ci ildə Məmməd Əmin Rəsulzadə və milli demokratiya ideoloqları tərəfindən təsis edilib. Azərbaycanda sovet hakimiyyəti qurulduqdan sonra partiya öncə gizli, sonradan siyasi mühacirətdə fəaliyyət göstərib.
1992-ci ildə Azərbaycanda Müsavat Partiyasının fəaliyyəti bərpa edilib. Xalq Cəbhəsinin liderlərindən biri, parlamentin o zamankı spikeri İsa Qəmbər partiyanın sədri seçilib və 2014-cü ilə qədər ona rəhbərlik edib. Nizamnamədə sədrlik müddətləri üçün qoyulan məhdudiyyətlərə əsasən, İsa Qəmbər başqanlıq üçün namizədliyini irəli sürməyib. 2014-cü ildə keçirilən qurultayda Arif Hacılı partiyanın yeni sədri seçilib.
Növbəti sədr seçkiləri üçün bir həftə əvvəl Tofiq Yaqublu və Yadigar Sadıqlı namizədliklərini irəli sürüblər.
