“İran Air” aviaşirkəti və bir sıra rəsmi şəxslər sanksiyalara məruz qalıb
“Hromadske”nin xəbəri
ABŞ İranın Rusiyaya ballistik raketlər tədarük etməsini pisləyib.
Vaşinqton İranın “İran Air” aviaşirkətinə, eləcə də bir sıra şirkət və rəsmilərinə sanksiyalar tətbiq edib.
Bu barədə ABŞ-ın Maliyya Nazirliyi məlumat yayıb.
Nazirlik qeyd edib ki, 2024-cü ilin yayında Rusiya hərbiçiləri İranda ballistik raketlərinin istifadəsi üzrə təlim keçiblər.
Bildirilir ki, Rusiya ballistik raketlərin ilk partiyasını sentyabrın əvvəli alıb.
“İran Rusiyanın qeyri-qanuni müharibədə iştirakını gücləndirmək qərarına gəlib, Amerika Birləşmiş Ştatları isə bizim tərəfdaşlarımızla birgə Ukraynanı dəstəkləməyə davam edəcək”, – ABŞ maliyyə nazirinin müavini Uolli Adeyemo deyib.
Sanksiya siyahısına İrandan və Rusiyadan 10 fiziki və 6 hüquqi şəxs düşüb.
ABŞ həmçinin İranın Rusiyanı silahla təmin etmək üçün istifadə etdiyi 4 gəmini, o cümlədən pilotsuz təyyarələri sanksiya altına alıb.
Tehranda yerləşən, sərnişin və nəqliyyat daşımaları xidmətləri göstərən “İran Air” şirkəti də məhdudiyyətlərə məruz qalıb.
Sanksiyalar siyahısına həmçinin İslam İnqilabı Keşikçiləri Korpusunun (İİKK), İran Müdafiə Nazirliyinin məmurları, habelə İran Müdafiə Nazirliyinin Rusiya hökuməti ilə əlaqəsi olan Ruhullah Katebi (Ruhulla Katibi) və Shahid Kharrazi (Şahid Kərrazi), “Industries” təşkilatının rusiyalı hərbçilərin təliminə görə məsuliyyət daşıyan əməkdaşı İbrahim Bəhrami daxil edilib.
Beynəlxalq qadağalara baxmayaraq, raketlərin buraxılmasına rəhbərlik edən İran Hərbi Hava Qüvvələri Kosmik Komandanlığının komandiri Əli Cəfərabadi də sanksiyaya məruz qalıb.
Bundan başqa, ABŞ hökuməti “Azadegan” və “Amad Behineh Saz Engineering Company” İran nəqliyyat şirkətlərini və onların rəhbərliyinə də sanksiyalar tətbiq edib.
Eyni zamanda, İranın Rusiyaya raket mühərriklərinin nümunələrini təqdim edən “Farzanegan Propulsion Systems” konstruktor bürosuna qarşı da sanksiyalar tətbiq olunub.
Qərbi Avropa ölkələri – Fransa, Almaniya və Böyük Britaniya da artıq İranı Rusiyaya ballistik raketlər ixrac etməkdə ittiham ediblər.
Ölkələr İranla ikitərəfli hava əlaqəsi müqavilələrini ləğv etmək üçün təcili tədbirlər görməyə söz veriblər.
Bundan əlavə, Fransa, Almaniya və Böyük Britaniya İranın ballistik raket proqramında iştirak edən təşkilatların və şəxslərin müəyyən edilməsini tələb edəcək.
Onlar həmçinin İranın dövlət aviaşirkəti olan “Iran Air”-ə qarşı sanksiyaların tətbiqi istiqamətində çalışacaqlarını vəd ediblər.
Londonun İrana və Rusiyaya qarşı yeni sanksiyalar tətbiq etməsi artıq məlumdur.
Məhdudiyyətlərə o cümlədən Rusiya Silahlı Qüvvələrinin Hava-Kosmik Qüvvələri, “924-cü Dövlət Pilotsuz Aviasiya Mərkəzi” və Rusiya hərbi nəqliyyat aviasiyasının komandanlığı məruz qalıb.
Əvvəl nə baş verib?
“The Wall Street Journal” Avropa və Amerika rəsmilərinə istinadən yazıb ki, İran artıq Rusiyaya yaxın mənzilli ballistik raketlər göndərib.
Bu, Rusiyanın Ukrayna şəhərlərinə və infrastrukturuna raket hücumlarını gücləndirdiyi vaxta təsadüf edir.
Ukrayna Xarici İşlər Nazirliyi İrandan Rusiyaya ballistik raket ötürülməsi ilə bağlı xəbərlərdən dərin narahat olduğunu bildirib və İran hakimiyyətini bundan çəkinməyə çağırıb.
Hələ avqust ayında “Reuters” Avropa kəşfiyyatındakı mənbələrə istinadən yazıb ki, İran Rusiyaya yüzlərlə yaxın mənzilli peyklə idarə olunan “Fath-360” ballistik raketi ötürə bilər.
