Meydan TV-nin həbsdə olan jurnalisti Xəyalə Ağayevanın telefon zənglərinə maneələr yaradılıb.
Bu barədə Ağayevanın yaxınları Meydan TV-yə məlumat verib.
Onların sözlərinə görə, iyulun 23-də Xəyalə Ağayeva telefon vasitəsi ilə dostu ilə danışarkən əlaqə kəsilib. Sonradan Ağayevanın zəngi bərpa edilməyib və o 15 dəqiqəlik zəng hüququnun bir neçə dəqiqəsini istifadə edə bilib.
Yaxınları deyir ki, jurnalistdən gün ərzində xəbər alına bilinməyib.
Qeyd edək ki, bundan öncə iyunun 25-də Meydan TV-nin digər jurnalisti Aytac Tapdıq da (Əhmədova) dostları ilə danışarkən əlaqə kəsilmişdi və gün ərzində zəng bərpa edilməmişdi.
Meydan TV-nin əməkdaşları Ramin Deko (Cəbrayılzadə), Aynur Qənbərova (Elgünəş), Aysel Ümüdova, Aytac Əhmədova (Tapdıq), Xəyalə Ağayeva, Natiq Cavadlı və vətəndaş cəmiyyətinin üzvü Ülvi Tahirov 2024-cü il dekabrın 6-da həbs edilib.
Bu iş üzrə saxlanılan şəxslərə Cinayət Məcəlləsinin 206.3.2-ci maddəsi ilə — qaçaqmalçılıq əvvəlcədən əlbir olan bir qrup şəxs tərəfindən törədildikdə — ittiham irəli sürülüb.
2025-ci il fevralın 5-də “arqument.az” saytının baş redaktoru, Meydan TV ilə əməkdaşlıq edən jurnalist Şəmşad Ağayev (Ağa), fevralın 20-də jurnalist Nurlan Libre (Qəhrəmanlı), fevralın 28-də Fatimə Mövlamlı, mayın 7-də Ülviyyə Əli (Quliyeva), avqustun 27-də isə Əhməd Muxtar bu iş üzrə həbs olunub.
Avqustun 28-də “Meydan TV işi” üzrə ittihamlar ağırlaşdırılıb. İş üzrə həbs edilən şəxslərə ümumilikdə Cinayət Məcəlləsinin 7 maddəsi ilə ittiham irəli sürülüb.
Həbs edilən jurnalistlər ittihamları qəbul etmirlər. Onlar siyasi sifarişlə həbs olunduqlarını, məqsədin ölkədə müstəqil medianı və azad səsləri susdurmaq olduğunu bildirirlər.
