“Çox güman ki, “qəsdən hücum” deyil, “bədbəxt hadisə”dir”
Polşa noyabrın 15-də ərazisinə düşən və 2 nəfərin həyatına son qoyan raket hücumunu “bədbəxt hadisə” adlandırıb.
Noyabrın 15-də, axşam saatlarında Polşanın Pşevodov (Prjewodow) kəndi ərazisinə iki raket düşüb. Raket zərbəsi iki nəfərin ölümünə səbəb olub.
Bundan sonra NATO noyabrın 16-da Brüsseldə səfirlərin fövqəladə iclasını çağırıb.
Polşa Prezidenti Andrzej Duda bildirib ki, raket çox güman ki, “qəsdən hücum” deyil, “bədbəxt hadisə”dir.
Polşa NATO hərbi alyansının 30 üzvündən biridir.
Hər bir üzv dövlət bloka daxil olmayan ölkələrin hücumlarına qarşı bir-birini müdafiə etməyə razılaşıb.
Avropa İttifaqı da Polşaya dəstək vəd edib. Rusiya raket zərbəsində hər hansı əli olduğunu təkzib edib.
Bu gün də raketin haradan gəldiyi ilə bağlı araşdırmalar davam edir.
“İlkin məlumatlara əsasən, zərbə çox güman ki, Rusiya raketlərini səmadan çıxarmaq üçün məşğul olan Ukrayna zenit sistemlərinin nəticəsidir”, – Belçikanın müdafiə naziri Ludivine Dedonder hadisəni şərh edərkən belə deyib.
O əlavə edib ki, bu nəzəriyyə hələ də davam edən araşdırmalarla təsdiqlənməlidir.
Rusiya Müdafiə Nazirliyi bildirib ki, Polşadakı qalıqların fotoşəkilləri Rusiya hərbi ekspertləri tərəfindən birmənalı olaraq müəyyən edilib.
Qeyd olunur ki, qalıqlar S-300 hava hücumundan müdafiə sisteminə aiddir.
Noyabrın 16-da Rusiyada jurnalistlərə açıqlama verən Kremlin sözçüsü Dmitri Peskov bəzi ölkələri raket insidenti ilə bağlı “əsassız iddialar” irəli sürməkdə günahlandırıb.
O bildirib ki, ABŞ-ın cavabı müqayisədə daha ölçülü-biçilidir.
“Bu halda Amerika tərəfinin ölçülüb-biçilmiş və daha peşəkar reaksiyasına diqqət yetirilməlidir”, – o deyib.
ABŞ Prezidenti Co Bayden hər hansı bir ölkəni günahlandırmadan əvvəl araşdırmanın nəticələrini gözlədiyini bildirib.
İlkin məlumatlarda raketlərin Rusiyadan atıldığı bildirilsə də, bu iddianı təsdiqləmək mümkün olmayıb.
İlkin araşdırmalar raketin Rusiya istehsalı olduğunu göstərib, lakin Polşa Prezidenti noyabrın 16-da, səhər saatlarında raketi kimin atdığının aydın olmadığını söyləyib.
ABŞ Prezidenti Co Bayden raketin, yəqin ki, Rusiyadan gəlmədiyini desə də, Finlandiyanın xarici işlər naziri Pekka Haavisto keçirdiyi mətbuat konfransında raketin haradan gəldiyini müəyyən etmək üçün hələ tez olduğunu bildirib.
“Associated Press” xəbər verir ki, ABŞ rəsmiləri bildiriblər ki, ilkin tapıntılar raketin Ukrayna qüvvələri tərəfindən Rusiyadan gələn raketə atıldığını göstərir.
Çin və Almaniya da daxil olmaqla bir sıra ölkələr raket zərbəsi ilə bağlı araşdırmaları sakitləşdirməyə çağırıb.
Almaniya kansleri Olaf Şolz raketin mənşəyi ilə bağlı hər hansı “tələsik” nəticə çıxarmağa qarşı xəbərdarlıq edib.
Raket zərbəsindən sonra Ukrayna münaqişəsinin qonşu ölkələrə sıçrayacağına dair artan narahatlıqlar fonunda Polşanın Milli Təhlükəsizlik Şurasının (BBN) noyabrın 16-da, saat 23:00-da ikinci iclası keçirilməsi planlaşdırılır.
