Vəkil: “Hicran Hüseynovanın dediyi qanuni tələbdir”
“Qadınlar bizə müraciət edirlər ki, aliment ala bilmirlər. Kişi aliment vermirsə, ölkədən çıxışına qadağa qoyulmalıdır”.
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova belə
deyib
.
Hicran Hüseynova bildirib ki, dünya təcrübəsində aliment verilməyəndə həmin pulu Aliment Fondu ödəyir. Kişi sonra həmin pulu Aliment Fonduna ikiqat artıq verir: “Azərbaycanda da Aliment Fondu yaransa, yaxşı olar”.
Hüquqşünas Zibeydə Sadıqova deyir ki, Hicran Hüseynovanın dediyi qanuni tələbdir, məhkəmə qətnaməsi icra edilməlidir. Əks halda, ilk dəfə xəbərdarlıq edilir, sonra ölkədən çıxışına qadağa qoyulur. Ən sonda da həbs edilir:
“Bu, Cinayət Məcəlləsinin 306-cı maddəsində də qeyd edilib. Həmin maddə məhkəmənin hökmünü, qərarını, yaxud digər aktını icra etməmə adlanır. Qərar icra edilmədiyi təqdirdə şəxs iki min manatdan dörd min manatadək miqdarda cərimələnir. Yaxud üç yüz iyirmi saatdan dörd yüz səksən saatadək ictimai işlərdə çalışmalıdır. Ən sonda da üç ilədək müddətə azadlıqdan məhrumetmə ilə cəzalandırılır”.
Hüquqşünas deyir ki, 84-1-ci maddə ilə həmin şəxsin ölkədən getmək hüququ müvəqqəti məhdudlaşdırılır.
